Фото:Canva/Прекумерното производство на себум може да придонесе за затнување на порите и појава на акни, додека агресивното отстранување на природните масла може да ја иритира и исуши кожата.

/11 /11

За актуелни содржини и вести од светот на родителството и бременост изберете ја Рингераја како свој омилен извор на Google.

Постави

Но себумот не е непријател на кожата. Напротив, тој е природен заштитен слој кој има важна улога во одржувањето на кожата здрава.

Себумот е масна супстанција што ја создаваат лојните жлезди, најчесто поврзани со фоликулите на влакната. Содржи мешавина од липиди, восоци и други масни компоненти.

Неговото производство е под влијание на хормоните, возраста, генетиката и состојбата на кожата.

КОЈА Е НЕГОВАТА УЛОГА?

Себумот не постои само за да ја направи кожата мрсна.

-        Тој помага се намали губењето на вода од кожата, масниот слој помага кожата да ја задржи влагата.

-        Ја поддржува кожната бариера. Заедно со другите компоненти на кожната бариера, себумот придонесува за заштита од надворешни влијанија.

-        Помага кожата и влакната да останат подмачкани и со тоа спречува прекумерна сувост и кршливост,

-        Помага да се одржи природната средина на кожата. Липидите од себумот учествуваат во создавањето услови во кои живее кожниот микробиом.

Значи, одредена количина себум е нормална и потребна.

ЗОШТО НЕКОЈ ИМА МНОГУ СЕБУМ, А НЕКОЈ МНОГУ МАЛКУ?

Производството на себум варира од човек до човек.

На него можат да влијаат:

-        генетиката,

-        хормоните,

-        возраста,

-        стресот и други фактори што влијаат врз организмот,

-        состојбата на кожната бариера,

-        одредени лекови и медицински состојби,

-        сезоната и надворешната средина

Особено значајни се андрогените, поради што производството на себум често се зголемува во пубертетот.

Токму затоа во адолесценцијата кај многу млади луѓе се појавуваат помрсна кожа и акни.

ДАЛИ МАСНАТА КОЖА ЗНАЧИ ДЕКА НЕ ЈА ЧИСТИМЕ ДОБРО?

Ова е една од најчестите заблуди.

Ако кожата произведува повеќе себум, тоа не значи дека е нечиста.

Прекумерното миење, агресивните средства и постојаното одмастување можат да ја иритираат кожата и да ја нарушат нејзината заштитна бариера.

Затоа целта не е да ја отстраниме секоја трага од себум.

Целта е да се одржи здрава рамнотежа.

ШТО СЕ СЛУЧУВА КОГА ИМА ПРЕМНОГУ СЕБУМ?

Кога производството е зголемено, себумот може да се комбинира со мртви клетки од кожата и други компоненти во фоликулот.

Тоа може да придонесе за:

- затнати пори,
- појава на митесери,
- бели комедони,
- појава или влошување на акни кај лица склони кон акни,
- поизразен сјај на кожата.

Но важно е да се знае дека акните не се предизвикани само од себумот.

Во нивната појава учествуваат повеќе процеси како зголемено создавање себум, затнување на фоликулите, воспаление и промени поврзани со микроорганизмите во фоликулите.

ШТО АКО ИМАМЕ ПРЕМАЛКУ СЕБУМ?

Кожата може да биде: сува, затегната, почувствителна на надворешни влијанија, склона кон лупење или иритација.

Но и тука постои важна разлика. Сува кожа не значи кожа без себум.

Сувоста може да биде поврзана со недостаток на вода, нарушена кожна бариера, надворешни услови или други фактори.

ДАЛИ ТРЕБА ДА ГО „УНИШТИМЕ“ СЕБУМОТ?

Продуктите за нега на мрсна кожа треба да помогнат во контролирање на вишокот себум и нечистотиите без непотребно сушење и иритација.

Најчесто е доволно:

-        нежно чистење на кожата,

-        соодветен хидратантен производ,

-        заштита од сонце во текот на денот,

-        избор на производи според типот и состојбата на кожата.

Ако имате акни, не мора сами да експериментирате со десетици производи.

Дерматолог може да процени зошто се појавуваат промените и која терапија е најсоодветна.

ШТО Е СЕБУМ КАЈ БЕБИЊАТА?

И кај новороденчињата лојните жлезди се активни.

Хормоналните влијанија од бременоста можат да имаат улога во зголемената активност на овие жлезди во првите недели од животот.

Затоа кај некои бебиња може да се забележат ситни мозолчиња и промени на кожата, како новороденечни акни.

Тоа не значи дека бебето има нечиста кожа и обично не треба агресивно третирање.

Себумот не е нешто што кожата треба целосно да го нема. Тој е дел од природниот систем за заштита на кожата.

Проблемот може да настане кога неговото производство е значително зголемено или кога, во комбинација со други процеси, придонесува за затнување и воспаление.