/11 /11

Откако станав мајка и се дружам со мајки, забележав дека постојат шаблони и изјави со кои со брзина на светлината можете да и ја симнете насмевката од лицето на една задоволна мајка. Еве го списокот, во случај да ви затреба

Немаш млеко/слабо ти е млекото

Реченицата која се однесува на количината и квалитетот на млекото е полн погодок. Со неа нема промашување – имате 100% ефект кога треба мајката на тоа мало бебе да ја срамните со земјата. Уште подобро ќе делува ако притоа ги пофатите нејзините гради додека загрижено вртите со главата и изговарате ц, ц, ц...

Гладно е

Оваа изјава оди рака под рака со претходната, но нејзината предност е што може да се користи и подоцна, кога детето ќе почне да јаде цврста храна. Посебно е ефектна кога детето плаче и не може да се смири – тогаш треба да ја повторувате на секои пет минути, со загрижен израз на лицето.

Ладно му е

Како една мајка би можела да знае како да го облече своето дете? Секако дека навреме треба да и го посочите тоа. Ефектот ќе биде најдобар ако не и се обратите на самата мајка. Игнорирајте ја неа. Загрижено и мило допрете ги рачињата и ножињата на детето и прашајте го: “Па тебе мама не ти облекла чорапчиња?” Истото повторете го и за капата, јакната, џемперот. Ефектот е загарантиран.

Како не гледаа нас, па што ни фали?

Истакнувањето на генерацискиот јаз и недостатокот на новите методи е секогаш делотворн начин кога сакате да изнервирате една мајка. Осбен акцент ставете на “Што ни/ви фали нас/вас?” Притоа не оставајте простор кутрата мајка да ви одговори  бидејќи – што разбира таа?!

Не го навикнувај во раце

Предупредете ја новопечената мајка навреме дека ова бебе завиткако во пелени, е всушност манипулатор, кој ќе и го загорчи животот доколку го навикне на прегратки и нежности. Бидејќи има ли поголема казна од држење во раце на сопственото дете?!?!?!

Е сега едно братче/сестриче да ти роди мама

 Бидете внимателни. Оваа реченица има најдобар ефект доколку се изговори непосредо по породување, најмногу до еден месец. Бидејќи жената не сака да слушне ништо друго освен предлогот да го повтори веднаш истото искуство.

Ова беше забрзан курс за почетници.

За напредно ниво можете да користите реченици како:

Уште не зборува/оди/прави оригами? Мојот малечок тоа го правеше беспрекорно на 4 и пол месеци.

Има неполни два месеци и уште не сте го ставиле на нокшир?! Доцните!

Уживај додека е мало, подоцна ова ќе ти недостасува.

Уживајте во гледањето на изнервирани лица. Јавете се да ни кажите дали советите делуваат.

Извор: Carapice