/11 /11

Телото треба да се негува, не само однадвор, туку и одвнатре. Тоа секако се однесува и на кожата. Ниту сета сила на чудотворните препарати нема да биде од голема помош ако кожата квалитетно не се храни одвнатре.

Немасен јогурт

Немасните млечни производи, богати со витамин А, прават чуда за нашата кожа. Јогуртот е најдобро решение бидејќи е добар за варењето, а особено се препорачува на оние кои имаат проблем со штитната жлезда и за оние кои боледуваат од дијабетес.

Зрнесто овошје

Боровинките, брусницата, јагодите и другите видови зрнесто овошје се преполни со антиоксиданси кои се заслужни за убава и здрава кожа. Во менито секако вклучете и шипки кои изобилуваат со витамин Ц.

Лосос

На кожата и се потребни есенцијални масни киселини кои најмногу ги има во рибата. Ако не сте љубител на риба, потребите за здрави маснотии ќе ги надополните доколку консумирате јаткасти плодови, како што се бадеми, бразилско оревче или ленено семе, односно сончоглед.

Зелен чај

Зелениот чај има многу предности, а особено е погоден за здравјето на кожата бидејќи содржи полифеноли кои имаат против-воспалителни својства. Освен тоа, помага и во борбата против некои видови тумор. Исто така содржи и витамин Ц, Д и К, но и рибофлавин, цинк, калциум, магнезиум и железо.

Вода

Најдобар пријател на кожата е редовна хидратација, а најдобар избор е обичната вода. Затоа ако сакате на својата кожа да и подарите здрав сјај, дневно испијте барем осум чаши вода.

Манго

Мангото е богато со витамин А, кој ги обновува клетките на кожата. Добра вест е што плодот има само 70 калории, па е идеален избор за сите оние кои сакаат да изгубат некој килограм.

Бадеми

Витаминот Е, со кој изобилуваат бадемите, помага и во хидратација на кожата одвнатре. Исто така, штити од оштетување и од појава на знаци на предвремено стареење поради што и се содржи во кремите против брчки.

Авокадо

Иако ова тропско овошје не е популарно, а ни лесно достапно во нашите краишта, има многу здраствени благодети. Авокадото е богато со витамините од Б-комплексот, со есенцијални масла и има против-воспалителни својства. Исто така, помага и при иритација на кожата, ги намалува црвенилото и јадежот.

Свежо сирење

Освен што изобилува со калциум, во сирењето има и селен и минерали во траги. Селенот ги штити клетките на кожата од оштетување што го предизвикуваат слободните радикали и помага при сувата кожа. Го има во месото, морските плодови, јајцата, печурките и интегралните житни зрна.

Морков

Познато е дека е одличен извор на бета-каротен, кој во телото е нужен за метаболизмот на витамин А. Морковите, исто така, се добар извор на витамин Ц кој е моќен антиоксидант и важен сојузник во борбата со слободните радикали, кои се појавуваат по претераното изложување на сонце. Исто така, помагаат и во формирање на колагенот во кожата, кој помага кожата да изгледа помлада и затегната.

Елвис Ќаили