Фото:Canva/Децата денес растат онлајн. Таблети, телефони и игри се дел од секојдневието, но опасностите не се секогаш таму каде што ги очекуваме.

/11 /11

Кога се зборува за интернет опасностите, најчесто првата асоцијација се непознати лица и несоодветни содржини. Но дигиталниот свет крие многу посуптилни ризици, кои лесно се занемаруваат бидејќи изгледаат нормално или безопасно. Токму тие најчесто имаат најдолгорочно влијание врз децата.

1. Прекумерна изложеност на екрани без јасна граница

Опасноста не е само во времетраењето, туку во отсуството на структура.

Последиците од ова може да бидат намалена концентрација, нарушен сон и потешкотии во саморегулација на емоции.

Затоа децата имаат потреба од јасни правила, а не од постојана достапност до интернет содржини.

2. Алгоритми што „учат“ наместо родителите

Платформите автоматски препорачуваат содржини според тоа што детето гледа. Децата не бираат туку алгоритмот бира за нив, често воден од ангажман, не од квалитет или соодветност за детето.

3. Рано формирање нереална слика за телото и успехот

Филтри, совршени фотографии и „идеални животи“ создаваат тивка споредба.

Децата се споредуваат со тоа што го гледаат и можат да развијат: ниска самодоверба, чувство дека не се „доволно добри“ и искривена перцепција за реалноста.

4. Дигитален притисок да се биде постојано достапен

Пораки, групи, реакции се очекувања за брз одговор кои создаваат анксиозност.

Детето ако не добие повратна реакција може да чувствува страв да не биде исклучено. притисок да одговара дури и кога не сака и замор од постојана онлајн присутност.

5. Онлајн шеги што оставаат реални последици

Мемови, коментари и иронија често се доживуваат како игра, но можат да прераснат во сајбер насилство.

Една порака може да се споделува бескрајно и да повреди подолго отколку што се мисли.

6. Апликации што собираат податоци без знаење

Многу игри и апликации собираат лични информации како локација, навики, интереси.

Децата ретко читаат дозволи, а родителите често не проверуваат што всушност се прифаќа.

7. „Безбедни“ платформи со скриени ризици

Дури и апликации наменети за деца може да содржат вградени реклами, можности за разговор со други корисници и несоодветна содржина што се појавува индиректно.

8. Загуба на приватност од најрана возраст

Фотографиите, видеата и информациите објавени од возрасните остануваат засекогаш. Децата растат со дигитален идентитет кој не го избрале и можеби нема да го одобрат подоцна.

9. Намалување на реалната социјална интеракција

Кога онлајн светот станува примарен, децата имаат помалку можности да учат за емпатија, решавање конфликти и читање невербални сигнали.

10. Родителскиот пример

Децата не го слушаат само тоа што го кажуваме туку и она што го правиме. Ако ние сме постојано на телефон, тешко е да очекуваме поинакво однесување од нив.

Што можат родителите да направат?

• Имајет отворен разговор со децата, не применувајте веднаш забрани.
• Воведете јасни правила и време без седење пред екрани.
• Заедно истражувајте содржини.
• Почитувајте ја приватноста на детето.

Интернетот не е непријател, но без водство може да стане тивка закана. Најсилната заштита не се апликациите и филтрите, туку вклучен, присутен и информиран родител.