Мајка ќерка

/11 /11

За актуелни содржини и вести од светот на родителството и бременост изберете ја Рингераја како свој омилен извор на Google.

Постави

Првата менструација не е само биолошки настан. Тоа е момент на премин, на нова фаза од животот. Како родител, начинот на кој ќе и пријдете на темата, може да ја обликува нејзината слика за телото, самодовербата и здравјето за цел живот.

1. Не чекајте да се случи – зборувајте однапред

Многу девојчиња ја добиваат првата менструација помеѓу 9 и 13 години. Но телесните промени почнуваат и порано како што се: развој на гради, бел исцедок, емоционални осцилации. Наместо да чекате до последен момент, почнете разговори уште пред да се случи менструацијата, со едноставни објаснувања, отворено и без табуа.

2. Темата менструација не ја претворајте во тајна

Менструацијата не треба да биде „женска работа што не се спомнува“. Таа е знак за здравје и природен дел од животот. Кога ќе и пристапите како кон нормална појава и со почит, и помагате да не чувствува срам. Можете дури и да и покажете како се користат влошки, како да води календарче или кога да побара лекарски совет.

3. Подгответе „прв менструален пакет“

Направете мал несесер со неколку влошки, влажни марамчиња, чиста долна облека и мало охрабрувачко писмо. Дајте и го предвреме, со насмевка. Ќе и биде корисен и ќе го памети како гест на грижа и љубов.

4. Бидете тука за неа, но не наметнувајте се

Ако сака да зборува – слушајте. Ако молчи – не вршете притисок. Самото ваше присуство и отвореност и кажуваат дека може да ви верува. Секоја девојка го доживува овој период различно, на некои им е срам, некои се горди.

5. Вклучете го и таткото (ако е присутен)

Важно е и татковците да не се исклучени од темата. Тивката поддршка, разбирањето и нормалниот став од машка фигура создава дополнително чувство на прифаќање и сигурност.

Менструацијата не е крај на детството, туку почеток на ново тело што треба љубов и грижа

Како ќе се однесувате вие, така ќе се однесува и таа со себе. Покажете и дека нема од што да се срами, дека не е „нечиста“, „непријатна“ или „тешка“. Покажи и дека е нормална, прекрасна и подготвена да расте.