/11 /11

На сите вас кои не ја пропуштате можноста да и кажете дека не е добра мајка ...

Вие што не избирате зборови и ја обвинувате за сè ..

И вие, што превртувате очи кога нејзиното дете се однесува на начин што не ви одговара.

И настрана ја гледате во паркот затоа што дои во јавност, како не и е срам! А и ти што ја обвинуваш дека не дои, туку го извадила тоа „отровно“ шише млеко од нејзината торба.

Особено вие, кои без пардон и кажувате дека се здебелила и дека може малку да се среди. Сепак, многу време помина од породувањето. Или ако премногу е средена и ослабена и кажувате дека може да посвети малку повеќе време на детето, наместо да мисли само на себе.

И ти што пишуваш или зборуваш за тоа дека таа е виновна ако го кара или не го кара своето дете. Де е многу попустлива, де е многу строга.

Ти што се грижиш дека детето го облекла премногу или премалку, или детето и е пречисто или превалкано...

И сите вие кои мислите дека сте подобри, или би биле подобри, а никогаш не сте оделе во нејзините чевли.

Па дури и ти, која исто така си мајка, а мислиш дека си подобра од неа и си даваш себеси право тоа да и го плеснеш во лице...

 И ти државо, која го убиваш достоинството на сите можни начини и уште и се потсмеваш со разни ветувања во кои никој веќе не верува.

И вие новинари кои пишувате и пласирате згодни јавни личности кои ден по породувањето се толку совршено исфотошопирани.

А да...и вие стручњаци кои ако сте имале и еден ден пракса знаете дека за родителството е најлесно да се зборува.

Дури и ти која случајно поминуваш и гледаш во нејзините подочници, коса, стомак.

Што ви е галје кога родила, колку деца родила, како ги родила и со кого ги родила...РОДИЛА!

Што ви е галје кој и го чува детето, дали денес испрала веш, дали испеглала и дали на детето му направила роденденска торта, или ја купила.

Можеби не знае да прави, можеби секој пат и гори кората за торта во рерна.  Или можеби одлучила цел ден да го помине со детето.

Можеби детето прерано го пуштила во градинка, бидејќи се бори за опстанок.

А можеби навечер, кога ти не гледаш, ги пее најубавите приспивни песни, го гушка своето дете и го сака бескрајно, иако не е најдобра мајка според твојата лична проценка.

Носела во својата утроба еден нов живот, го донесла на свет и тука не е крајот. Баш од неа зависи во што ќе израсне нејзиното чедо. И баш од нејзината самодоверба зависи каков родител ќе биде.

Зошто тогаш ја убиваш во поим?

Ако му посакуваш добро на детето, направи и добро на мајката. Направи да биде горда и да верува во себе, бидејќи тоа ќе го пренесе и на детето.

Помогни и!

Лесно е...

Кога ќе ја сретнеш кажи и дека е убава и дека зрачи.

Кажи и дека добро се снаоѓа во родителството.

Пофали ја дека е прекрасна мајка. Прави го тоа секој ден.

И ќе видиш како ќе засјае. Бидејќи таа само тоа и го сака, да биде добра мајка, баш таква каква што е.

Со таква задоволна, среќна и горда мајка, детето ќе биде уште подобро.

Не и ги сечете крилата на мајката...така го убивате целиот свет. Дајте и крила да полета и да создаде некои нови луѓе, многу подобри од сите нас.