Трчање и здрави коски

/11 /11

Прашањето што често се поставува е: што ги прави коските цврсти и отпорни?

Минералите се градбени блокови на коската

1. Калциумот е најважниот минерал за коските. Околу 99% од целиот калциум во телото е складиран токму во нив. Недостатокот може да доведе до остеопороза и кршливост.
2. Фосфорот заедно со калциумот создава цврста структура, калциум фосфат која им дава на коските сила и издржливост.
3. Магнезиумот и цинкот помагаат во правилна минерализација и го поддржуваат создавањето на ново коскено ткиво.

Витамини или скриените сојузници

• Витаминот Д овозможува калциумот да се апсорбира во цревата и да стигне до коските. Без него, колку и да внесуваме калциум, телото не може да го искористи.
• Витаминот К игра улога во производство на протеини кои ја врзуваат минерализацијата на коските.
• Витаминот Ц е неопходен за синтеза на колаген, протеин кој им дава еластичност и структура.

Протеини и колаген, основата на цврстината

Коските не се составени само од минерали. Околу една третина од нејзината структура е составена од колаген, протеин кој создава „решетка“ врз која се таложат минералите. Таа комбинација ја прави коската и цврста и еластична за да може да издржи удари без да се скрши лесно.

Движењето како лек

Физичката активност, особено вежби со тежина (трчање, танцување, скокање, тренинг со сопствена тежина), го стимулираат коскеното ткиво да се обновува и зацврстува. Децата и тинејџерите што се активни градат посилни коски, но и возрасните можат да ја задржат цврстината преку редовно движење.

Фактори што ја ослабуваат коската

• Недоволен внес на калциум и витамин Д.
• Прекумерна консумација на газирани пијалаци и кофеин.
• Пушење и алкохол.
• Физички пасивен начин на живот.

Коските се резултат на совршена комбинација од минерали, витамини, протеини и физичка активност. Тие не се нешто што еднаш се формира и останува исто. Напротив, коскеното ткиво постојано се обновува. Затоа, грижата за нив мора да започне од најрана возраст и да продолжи цел живот.

Здравата исхрана, сонцето и движењето се најдобрите сојузници за силен и издржлив скелет.