/11 /11

За актуелни содржини и вести од светот на родителството и бременост изберете ја Рингераја како свој омилен извор на Google.

Постави

Со години наназад, многу професионалци од областа на доењето забележуваат дека постои врска меѓу раното воведување на шишенце или цуцла лажалка и проблемите со доење. Исхраната со мајчино млеко преку мајчините гради секогаш има предност пред било кој друг вид на хранење. Освен тоа, често постојат алтернативи освен хранење со шишенце кои треба да се испробаат, како хранење со лажиче. Ако мајката избере употреба на шишенце во текот на првиот месец на бебето, некои тактики при хранењето можат да помогнат да се одржува доењето.

На пример, во повеќето случаи е најдобро да се избере шишенце со цуцла која има послаб проток и која е доволно долга за детето да може да ја вовлече доволно длабоко во усната шуплина, како што е тоа случај со мајчината брадавица. По мека цуцла е подобар избор од по тврда.

Некои стручњаци за доење препорачуваат бебето да се храни со шишенце во положба во која би се доело, за да се навикне на истата поза при хранење, а додека други препорачуваат бебето да се храни со шишенце во седечка положба. Кога ќе почне со хранење препорачливо е мајката да го понуди шишенцето исто како што би ја понудила дојката – со допирање на бебешката уста со брадавицата – се додека бебето не ја отвори широко устата. Тогаш треба на бебето да му се допушти само да ја повлече цуцлата, а не да му се стави цуцлата во уста. Би требало да се избегнува бебето да пие само од врвот на цуцлата, со стиснати усни. Колку е процесот на хранење со шишенце посличен на доењето толку и доењето полесно ќе се одржува.

Иако овие совети се корисни за сите бебиња кои се хранат со шишенце, посебно им се наменети на доенчињата со возраст меѓу 12 недели и шест месеци.

Бебињата треба да се хранат со шишенце:

• тогаш кога сами ќе дадат знак дека се гладни, а не по фиксен распоред.
• во подисправена положба: посебно е важно да се спречи бебето да пие од шишенце додека лежи на грб. Таквата положба е поврзана со кариес предизвикан од хранење со шишенце и зачестени инфекции на увото. Обрнете внимание на тоа бебето почесто да го држите во раце и кога не го храните, за да не се навикне да бара храна, само за да го држите во раце.
• менувајќи ја положбата од една на друга страна (од лево кон десно на пример) на половина од хранењето – ќе осигури стимулација и развој на видот и ќе спречи бебето да преферира една положба, што би можело да влијае на доењето.
• елементот време е многу важен, бидејќи за бебето е неопходно да го препознава чувството на ситост многу порано од моментот кога желудникот ќе му биде преполн. Треба да подготвите количина на млеко која одговара на возраста и тежината на бебето и времето на хранење со шишенце да биде исто со времето на доење.
• хранете го бебето нежно, дозволувајќи му само да ја прифати цуцлата, а не ставајте му ја Вие цуцлата во уста.
• во склад со ритамот на доење, на детето треба да му овозможите чести паузи додека пие од шишенце, како би се имитирал мајчиниот рефлекс на испуштање на млекото. На тој начин бебето се одвраќа од лакомото пиење од шишенцето.
• хранете го до ситост, на начин со кој нема да го присилите да ја испие и последната капка млеко. Доколку бебето се успие и ја испушти цуцлата пред да го испразни шишенцето, тоа значи дека е готово со оброкот. Немојте да го будите за да го испие млекото од шишенцето.

Предности на ваквиот начин на хранење со шишенце

• Бебето ќе испие онолку млеко колку што одговара на неговата возраст и тежина, наместо да испие премалку или премногу. Тоа може да ја охрабри мајката која работи и се измолзува да ја покрие потребната количина на млеко за дневните потреби на бебето.
• Може да се намалат симптомите на колики кај бебето чиј желудник е преполн и проширен.
• Го поддржува доењето со надеж дека тоа ќе продолжи, или повторно ќе се воспостави, особено кај доилките кои се одвоени од своите бебиња.

Доколку мајката не може да дои, или на детето му е потребна дополнителна количина на млеко, постојат неколку алтернативни начини на хранење. Покрај шишенцето на располагање Ви стојат и други можности како што се лажиче, капалка, шприц за хранење. Предвреме родените бебиња се хранат и со сонда додека сеуште не се способни да се хранат самостојно.

Начинот на исхрана кој ќе го изберете секогаш треба да биде:

• сигурен за бебето
• во склад со неговата возраст и телесна тежина
• едноставен за употреба на родителот
• со пристапна цена, расположив во секое време и во склад со хигиената
• на начин кој на бебето ќе му помогне да продолжи или воспостави доење

Извори: lalecheleague и kellymom