Фото:Canva/Доаѓа момент кога детето ќе побара да има свој Facebook профил било затоа што „сите други го имаат“, било од љубопитност и желба за независност. Наместо да се исплашиме или да реагираме строго, важно е разговорот да биде мирен, отворен и насочен кон укажување на безбедноста.

/11 /11

Но што кога вашето дете ќе побара Facebook профил? Како родителите да реагираат? Дали  со забрана, дозвола или нешто помеѓу?

Ова е водич што ќе ви помогне да донесете најзрела и најбезбедна одлука.

1. Разговор, не паника

Првата реакција не треба да биде „Не, забрането е“ туку разговор. Прашајте го детето:

• Зошто сака профил?
• Што очекува од него?
• Што мисли дека се случува на Facebook?

Често децата имаат идеализирана слика за социјалните мрежи односно дека тоа е само игра или место за споделување смешни видеа.

2. Минималната возраст постои со причина

Facebook официјално дозволува регистрирање од 13 години.
Ова ограничување не е случајно и поврзано е со: заштита на лични податоци, безбедност на малолетници, способност за препознавање ризични ситуации.

Ако детето е помало од оваа возраст, најдобро е да му објасните дека правилата важат за сите и дека не се само ваши правила.

3. Бидете отворени, но поставете јасни граници

Ако детето е доволно големо и решите да му дозволите профил, тоа не треба да биде „дива зона“.
Поставете основни правила. Профилот мора да биде приватен. Укажете какви фотографии може, а какви не смее да објавува. Научете го да не прифаќа непознати луѓе и да ви каже ако добие пораки што го вознемируваат. Исто така да ви ги даде податоците за логирањето како корисничко име и лозинка барем во првите месеци.

Ова не е шпионирање, туку заедничка изградба на дигитална безбедност.

4. Објаснете ги ризиците, но без застрашување

Децата не знаат колку реални опасности има преку: лажни профили, злоупотреба на фотографии, навреди и кибер-насилство, несоодветна содржина.

Не треба да ги исплашите, но треба да им објасните дека интернетот е јавен простор и дека таму ништо не исчезнува.

5. Бидете соучесници, не противници

Покажете интерес за она што го сака. Понекогаш доволно е да кажете: „Ајде заедно да видиме како функционира Facebook.“
Тоа ја отвора вратата за доверба. Доколку сте премногу строги, детето може да направи тајна сметка што е многу поопасно.

6. Понудете безбедна алтернатива ако е прерано

Ако детето е мало, понудете други опции како: апликации за комуникација со одобрени контакти, детски мрежи со ограничена содржина, заеднички семеен профил за игра и учење.

Важно е да му покажете дека го разбирате неговиот интерес, дури и ако не го исполнувате.

7. Бидете пример

Децата учат од тоа што го гледаат.
Ако вие објавувате преголеми количини лични информации, користите филтри или влегувате во расправии на мрежи, не можете да очекувате детето да се однесува поинаку.
Покажете дигитална култура за да ја барате и од нив.

Кога детето ќе побара Facebook профил, тоа е и знак дека расте и дека посакува да биде дел од светот кој го гледа околу себе.
Вашата задача не е да го контролирате секој чекор, туку да го научите како да се движи безбедно низ дигиталниот простор.

Со разговор, стекнување доверба и јасни правила, Facebook може да стане алатка за учење, комуникација и раст, а не извор на ризици.