Фото:Canva/Со доаѓањето на пролетта природата се буди, но за многу деца тоа значи и појава на алергиски реакции.

/11 /11

Цветањето на растенијата и појавата на полен во воздухот може да предизвикаат реакции кај чувствителните деца. Пролетните алергии се честа појава, но со правилен пристап симптомите можат значително да се ублажат.

Што ги предизвикува пролетните алергии?

Најчест причинител на пролетните алергии е поленот од дрвја, треви и други растенија. Кога детето вдишува полен, имунолошкиот систем може да реагира како да станува збор за штетна супстанција. Ова доведува до појава на симптоми на алергиски ринитис, познат и како Hay Fever.

Најчести симптоми кај децата

Симптомите обично се појавуваат во периодот на цветање и можат да варираат по интензитет. Најчесто се јавува: зачестено кивање, затнат или растечен нос, чешање на носот и очите, црвени и насолзени очи, кашлица, замор и раздразливост.

Кај некои деца, алергијата може да ги влоши и симптомите на астма доколку боледуваат од неа.

Како да му помогнете на детето?

Иако не може целосно да се избегне контактот со полен, постојат неколку практични чекори кои можат да помогнат.

-        Ограничете го изложувањето на полен

Во денови кога концентрацијата на полен е висока. Обидете се детето да поминува помалку време надвор, особено рано наутро и во ветровити денови.

-        Редовна хигиена по престој надвор

По играње надвор, препорачливо е детето да ги измие рацете и лицето, а по можност и да се истушира. Така се отстранува поленот од кожата и косата.

-        Проветрување на домот во вистинско време

Просториите проветрувајте ги навечер или после дожд, кога концентрацијата на полен во воздухот е помала.

-        Следете ги симптомите

Доколку симптомите се силни или траат подолго време, консултирајте се со педијатар. Во некои случаи може да биде потребна терапија со антихистаминици или други лекови.

Може ли детето да ја „надрасне“ алергијата?

Кај некои деца симптомите се намалуваат со текот на годините, додека кај други алергијата може да продолжи и во адолесценцијата. Раното препознавање и правилното управување со симптомите може значително да го подобри квалитетот на животот на детето.

Пролетните алергии се чест проблем во детството, но со соодветни превентивни мерки и навремена медицинска помош, симптомите можат успешно да се контролираат. Најважно е родителите да ги препознаат првите знаци и да реагираат навреме, за детето да може безгрижно да ужива во пролетните денови.