/11 /11

Природата постојано фасцинира со својата уникатна убавина а уметничката душа умее да препознае потенцијал во скоро секој нејзин сегмент. 

Една необична и несекојдневна уметност создава Александар Радически од Гостивар, која се среќава како „Stone Art“, или „Pebble Art“, односно „Врамени слики со каменчиња и природни материјали“.

"Камчиња се насекаде околу нас и секое си има своја посебна убавина и приказна. Секое се разликува од другото по својата форма, облик, структура и со тоа секое камче посебно и уникатно само по себе. И она камче кое изгледа најобично и наједноставно во себе крие одреден детал или тајна кои го прават камчето посебно и фасцинантно." - ја започнува Александар својата приказна за оваа негова пасија. 

Колекционер е на преку 15.000 уникатни камчиња кои ги чува уредно распоредени по теми, бои, облик, и спакувани во специјални фиоки. Каменчињата најчесто ги собирал на патувања (езера, реки, плажи, мориња, планини) , ни открива Александар.

Радически е уметничка душа и неговите интереси како и работата, секогаш биле и се поврзани со уметноста,како и со фотографија и рачната изработка на слики,поставени на природна подлога од орев, костен, цреша и до природни материјали или камчиња.

Рингераја: Кога и како започна со колекционерство на камчиња?

Александар: Со колекционерство ( собирање) камчиња почнав пред околу 10тина години. Случајно започна тоа мое хоби/ пасија. Се почна на еден летен одмор каде на плажа случајно забележав неколку убави камчиња кои истите одлучив да ги сочувам. Со тек на времето, секое следно убави забележано камче само ја зголемуваше мојата колекција, која брои повеќе од 15000 уникатни и уредно селективно групирани камчиња. 

Рингераја: Како дојде до идејата за да ги создаваш овие дела?

Александар: Откако помина извесен период од веќе настанатата колекција, одлучив од истите да направам нешто, се одлучив тоа да биде слика со внесени / врамени камчиња, надополнета со природни материјали, и така до ден денес а верувам и понатака ќе остане дел од мене оваа уметност.

Рингераја: Кое беше твоето прво дело?

Александар: Моето прво дело е „Цвет“. Тоа беше првото нешто кое ми падна на памет како идеја и истото го реализирав во 2016 година. Всушност од тогаш почнав да се занимавам и да творам во овој уметнички правец „Stone Art“" . 

Рингераја: Кажи ни нешто повеќе околку процесот и начинот на создавање "Врамени слики со каменчиња и природни материјали"? 

Александар: Камчињата кои ги користам за сликите се само лакирани, со цел да се потенцира нивната природна убавина и сјај, онака како што ги наоѓаме во нивната природна средина, водата. Подготовката на камчиња лакирањето трае ден-два. Додека целосното создавање на сликата со камчиња и останатите природни материјали, трае од 5 до 8 дена. Тоа подразбира и воедно бара исклучително трпение, концентрација, смиреност и голема љубов пред се. Оваа уметност опфаќа детали што навидум се едноставни а сепак за нив се вложува многу труд. 

Рингераја: Си посетувал ли некоја обука за истото?

Александар: Не, ништо немам посетувано, с? произлезе од мене лично, од моја замисла, логика, начин на работа, концепти итн. 

Александар: Најчесто на социјалните мрежи,но би кажал дека и те како најдобра реклама се самите купувачи, со нивните сугестии. 

Рингераја: Изработуваш ли дела по нарачка, имаш ли некои конкретни барања од купувачите?

Александар: Секогаш во принцип е така, работам само по нарачка, готови не творам, освен за себе, бидејќи со готовите дела купувачот е ограничен, во спротивно си кажува што и како би сакал, тема, димензии, материјали итн.. Да, има конкретна побарувачка од купувачите на одредена тема, но најчесто предлог темата е избрана од купувачот, додека се друго се остава на мој избор.

Рингераја: Покрај pebble art, изработуваш и други производи и творби.

Александар: Да, творам и многу други работи, изработувам накит од самите камчиња, дрвени минијатурни кутии, ланчиња,кутии за накит, држачи за накит,вазни ...

Рингераја: Сметаш ли дека доволно е ценета рачната изработка?

Александар: Делумно да, би кажал по тоа прашање, ценета е, не дека не е, но како да фали уште, можеби тоа е до размислувањето и замислата на нештата на самите купувачи, бидејќи не секој (што е и нормално) има увид и преглед на одредено творење,во секој дел на уметноста постојат дела, изработки, слики итн што навидум се многу едноставни асеоак тежок е патот до нивна реализација. 

Публиката го гледа само производот и го плаќа само како производ, но го занемарува начинот на кој е дојдено до самото дело. Лично сметам производот е тој што последен се плаќа, начелно се плаќа уникатноста и начинот на творбата,па на крај е самиот производ. 

Му благодарам на Александар за издвоеното време и му посакуваме уште многу успеси во творештвото и во иднина.