/11 /11

Ахх тој мирен сон и сингл живот! Понекогаш со душа сакаме барем неколку дена уживање во едноставната утринска рутина. БАП! Ете една перница влета во вашата постела. Малите неранимајковци веќе започнале со брканиците. Со полуотворени очи се движите кон купатилото и полусвесно ја ставате четката за заби во устата. Помалото ве тегне и сака да се искачи на вас како да сте неосвоив планински врв. Со едно дете во рака продолжувате да се миете.

Остатокот ви е доволно познат, на еден му фалат боиците, моливите, тетратките се во ранецот кај другиот, напикани исповиткани учебници, патиките обратно облечени, врвките незаврзани, кај другото патики облечени а пантолоните останале некаде во плакарот, можеби веќе и не се потребни пантолони за на училиште?

Пред да ви се случи нервен слом, зовривате и сакате да се развикате на цел глас! Мора да се фати ред!

Утринска рутина за подготовка во училиште

Сакате организирано и средено без хаос и турканици да излезете од дома? Ајде да се обидеме да склопиме една утринска рутина.

• Спиење. Или стануваат порано од вас и се хиперактивни, или се мачите да ги разбудите. Воспоставување ред во спиењето е една од поважните работи кои може да ги исконтролирате.

• Облекување. Се мачите со комбинации на облека, бои, маички, блузички? Можеби планирање од вечер е многу ефективно. Подгответе ги облеките навечер, за сабајле да не губите време во хаосот и бирање што да се носи.

• Распоред! Направете распоред, но вашите деца нека го сфатат како игра. Сите чекори се предвидени однапред и распоредот поставен на видно место. Ако се малечки, ставките може да бидат и нацртани (чорапи, пантолони, блуза, чевли, ранче). Вие ќе бидете диригентот кој ги спроведува активностите, а тие ќе извршуваат задачи и кој ќе се подготви на време ќе добие награда. Ќе градите самостојност кај децата, што е голема награда и за вас.

• Станување порано. Секако, и вие сакате да си поспиете но можеби е подобро да ги надмудрите сите и да станете малку порано. Доволно е да се измиете, истуширате и да ги подготвите вашите работи. Процесот на подготовка на децата ќе биде многу полесен доколку вие сте подготвени.

• Потсетници. Чевлите, врзани се? Ранчето, учебникот го стави внатре? Забите, измиени се?

• Избегнете викање и лошо однесување. Негативните сугестии брзо ќе се провлечат во рутината. Ниеден родител не сака да го испрати своето дете надвор по караница. Сакате вашите деца да го започнат денот подготвени и да го постигнат нивниот академски потенцијал.

Ахх, се е под контрола. Може да здивнеме. Полека се наближуваме кон нашата работа, влегуваме во канцеларија, 1, 2, 3, чук чук! Имате 34 состаноци, 19 пропуштени повици, 24 задачи за исполнување!