Фото:Canva/Самопочитта не се гради со големи зборови, туку со секојдневни гестови што му покажуваат на детето дека е способно, вредно и сакано.

/11 /11

Родителите често не ни забележуваат дека токму обичните ситуации како појадокот, играњето, училишните задачи, па и конфликтите се „училница“ во која детето учи да се вреднува себе си.

Во продолжение следуваат неколку практични примери кои покажуваат како секој ден може да стане можност за градење здраво чувство на сопствена вредност.

1. Наутро - дозволете му на вашето дете да направи избор

Самопочитта се гради кога детето чувствува дека неговите одлуки имаат тежина. Наместо да му ја изберете облеката, понудете му две комбинации.

Пример: „Дали денес сакаш да ја облечеш сината маичка или онаа со тигарчиња?“

Овој едноставен избор му испраќа порака: „Твоето мислење е важно.“

2. Заедничко готвење - покажува дека имате доверба во неговите способности

Вклучувањето на детето во „возрасни“ задачи му дава чувство дека е способен и дека придонесува.

Пример:
Дозволете му само да ги измие доматите или да ја измеша салата.
Кога ќе заврши, кажете: „Супер си, салатата е баш вкусна благодарение на тебе.“

3. На игралиште - охрабрувајте го вашето дете, но без претерување

Самопочит не се гради со фрази „ти си најдобар“, туку со реално препознавање на трудот.

Пример: Кога детето ќе се лизне по високото лизгалиште за првпат, кажете: „Забележав дека беше малку исплашен, но сепак проба. Браво за храброста.“

Ова го учи дека е важен напорот и обидот, а не секогаш се да се завршува со совршенство.

4. Ситна грешка - учете го дека неуспехот не го дефинира

Децата брзо развиваат ниска самопочит кога грешките се казнуваат или исмејуваат.

Пример: Ако истури вода на масата, наместо: „Ете пак не внимаваш“, кажете: „Не е проблем, ќе избришеме заедно. Се случува.“

Ова го учи дека грешката не ја намалува неговата вредност.

5. Навечер - разговарајте за чувствата, а не за резултатите

Разговорите пред спиење се моќен момент за врска и доверба.

Пример: „Што беше најтешко денес? А кога најубаво се чувствуваше?“

Со тоа му покажувате дека неговиот внатрешен свет, неговите чувства се важни, а не само достигнувањата.

6. Психолошко огледало - кажувајте му го тоа што го гледате во него

Децата ја градат сликата за себе според зборовите на возрасните.

Пример: „Гледам дека си упорен кога учиш нешто ново.“ „Го сакам начинот на кој се грижиш за своите играчки.“

Ова создава стабилна внатрешна слика за себе, независна од туѓо одобрување.

7. Дајате му можност да помогне

Кога детето чувствува дека има улога, се чувствува важно.

Пример: „Можеш ли да ми помогнеш да ги подредиме книгите? Многу ми значи твојата помош.“

Преку ова учи дека е компетентно и дека неговиот труд вреди.

Самопочитта се гради чекор по чекор, преку секојдневни моменти исполнети со избори, доверба, охрабрување, емпатија и прифаќање. Кога родителот ќе го гледа детето не како некој што треба да биде „совршен“, туку како личност што учи и расте, тогаш се создава простор детето да верува во себе.