Рефлекс на изненадување кај бебе

/11 /11

Што е рефлексот на изненадување (Моро рефлекс)?

Рефлексот на изненадување познат и како Моро рефлекс е примитивен, автоматски одговор што се јавува кај новороденчињата кога тие се чувствуваат ненадејно нестабилно или преплашено. Тоа е еден од првите знаци дека нервниот систем функционира нормално.

Како изгледа?

Обично се манифестира со следниве движења: бебето прво нагло ги шири рачињата и нозете притоа отворајќи ги  дланките, понекогаш ја зафрлува главата малку наназад, а потоа ги собира рацете кон телото, како да бара утеха. Може да биде проследено и со плач.

Што го предизвикува?

Моро рефлексот се активира кога бебето:

• Ќе почувствува како да паѓа дури и при мало движење надолу
• Ќе ненадеен силен звук
• Ќе доживее промена во светлината или температурата
• Ќе се допре себе си одненадеж

Често се јавува и при преместување на бебето или дури и при облекување.

Колку долго трае?

Моро рефлексот е привремен и исчезнува природно со развојот на нервниот систем. Типично: се појавува од раѓање, најизразен е во првите 2 месеци, обично исчезнува до 4-тиот месец, а до 6-иот месеци речиси целосно се губи.

Ако продолжи и по 6-тиот месец, добро е да се консултирате со педијатар за понатамошна проценка.

Како да му помогнете на бебето?

Моро рефлексот е безопасен, но може да го разбуди бебето или да го вознемири. Еве неколку совети:

• Завиткајте го бебето со мека пелена или ќебенце, што му дава чувство на сигурност. Важно е да престанете со повивање кога бебето почнува да се врти самостојно.
• Овозможете тивка и смирена средина преку минимизирање на силни звуци и нагли движења
• Кога го кревате или го враќате бебето во креветче, правете го тоа бавно и стабилно. 

Зошто е важен овој рефлекс?

Рефлексот на изненадување е одраз на здрав развој на мозокот и ‘рбетниот мозок. Тоа е еден од првите тестови што педијатарот ги прави по раѓање.

Недостиг или асиметрија на рефлексот може да укажува на: повреда при породувањ, проблеми со моторниот развој, невролошки состојби.

Рефлексот на изненадување е еден од чудните, но целосно нормални делови од првите месеци на живот. Иако може да изгледа драматично, тоа е знак дека телото на вашето бебе реагира како што треба. Со разбирање и трпение, наскоро ќе забележите дека оваа фаза природно поминува, оставајќи простор за нови, свесни движења и насмевки.