Фото:Canva/Кога ќе дојдат децата, секојдневието се менува. Времето, енергијата и приоритетите често се насочуваат кон најмалите. Но, силната партнерска врска останува важна основа за стабилно и исполнето семејство.

/11 /11

За актуелни содржини и вести од светот на родителството и бременост изберете ја Рингераја како свој омилен извор на Google.

Постави

Со новите обврски, непроспиените ноќи и постојаната грижа за детето, многу сопружници несвесно почнуваат да функционираат само како родители, а сè помалку како партнери. Иако децата стануваат центар на семејниот живот, здравата и стабилна партнерска врска останува основата врз која се гради среќно семејство.

1. Децата имаат потреба од родители кои се поврзани

Најголемото чувство на сигурност кај детето доаѓа кога расте во дом исполнет со љубов, почит и разбирање.

Детето учи преку пример:

• како се решаваат несогласувања,
• како се покажува почит,
• како изгледа здрава партнерска врска,
• како се изразуваат љубовта и поддршката.

Кога партнерите имаат добар однос, тоа позитивно влијае и врз емоционалниот развој на детето.

2. Родителството не треба да го замени партнерството

Во првите години по раѓањето на детето, лесно е сите разговори да се сведат на пелени, оброци, градинка и обврски.

Но важно е да најдете време и за разговори што не се поврзани со децата, за вашите заеднички интереси, да има многу смеење и споделување убави моменти. Едноставно да се потсетувате зошто сте се избрале еден со друг. 

3. Малите гестови ја одржуваат блискоста

Не е потребно секој викенд да организирате романтични патувања.

Доволно е заедно да испиете кафе наутро, да направите кратка вечерна прошетка, да си подарите прегратка по напорен ден и искрен комплимент, да одвоите еден за друг неколку минути разговор без телефони.

Токму малите моменти ја одржуваат емоционалната поврзаност.

4. Поделете ги обврските

Кога целата грижа паѓа на едниот партнер, лесно може да се појават замор и незадоволство.

Потрудете се:

• да ги поделите домашните обврски,
• заедно да се грижите за децата,
• да се поддржувате кога некој е уморен,
• да покажувате благодарност за вложениот труд.

Партнерството значи да функционирате како тим.

5. Не заборавајте на интимноста

Интимноста не се сведува само на сексуалниот живот. Таа вклучува: нежност,допири, искрени разговори, емоционална блискост и взаемна доверба.

Одржувањето на интимноста помага врската да остане силна и покрај секојдневните предизвици.

6. Прифатете дека промените се нормални

По доаѓањето на детето, односот неизбежно се менува.

Важно е:

• да бидете трпеливи еден со друг,
• да не очекувате сè веднаш да биде како порано,
• да разговарате отворено за чувствата и потребите.

Промените се природен дел од семејниот живот.

7. Најдете време само за вас двајца

Иако не е секогаш лесно, повремено време без децата може да ја освежи врската.

Тоа може да биде вечера надвор на вашето омилено место или да откриете ново, кратка прошетка, гледање филм дома кога децата ќе заспијат и да најдете заедничко хоби.

Не е важна должината на времето, туку квалитетот на заедничките моменти.

8. Побарајте помош кога е потребно

Понекогаш заморот, стресот и секојдневните обврски можат да создадат дистанца меѓу партнерите.

Не двоумете се:

• да разговарате отворено за проблемите,
• да побарате поддршка од блиските,
• да се консултирате со брачен или семеен советник ако чувствувате дека ви е потребна стручна помош.

Да се биде добар родител е важно, но исто толку важно е да останете добри партнери. Детето ќе порасне и ќе создаде свој живот, а партнерската врска останува темелот на семејството. Со меѓусебна почит, искрена комуникација, поделени обврски и време посветено еден на друг, можете да изградите брак кој ќе биде силен и исполнет, а воедно ќе му дадете на вашето дете најдобар пример за љубов, доверба и заедништво.