/11 /11

Кашичките од зеленчук се воведуваат во исхраната на доенчињата три недели по воведувањето на житарици. А кога за тоа ќе дојде време, родителите имаат многу прашања. Најчеста е дилемата дали се подобри домашните или купечките кашички.

Ќе се обидеме да одговориме:

Кашички од кујната на мама

Плус за домашните кашички: Подготовката на храна за бебето не се разликува многу од подготовката на храна за целото семејство. Таквиот начин е поефтин, постои можност за полесно мешање на зеленчукот при правење на пире и поголема разновидност. Исто така, на тој начин ги користите продуктите кои ги купувате и за останатите членови на семејството. Домашната храна е повкусна од индустриската, а нејзиниот состав може да се контролира до најситниот детал. Освен што е квалитетна, таа е и поефтина.

Минус за домашните кашички: За подготвување на храна за доенче во домашни услови потребно е повеќе време и напор.

Индустриски направени кашички

Плус за индустриските кашички: Комерцијалната храна за бебиња е практична и сигурна и одговара на препораките на Европската асоцијација за гастроентерологија, хепатологија и исхрана. Адекватна и прилагодена на возраста на бебето, пакувана во мали порции и згодна за престој надвор од домот.

Минус за индустриските кашички: Готовите кашички често содржат повеќе вода, скроб и шеќер од храната направена во домашни услови. Царевниот скроб или оризовото брашно служат за згуснување на кашичките, а во некои од нив се додава сол или шеќер – за да им се подобри вкусот. Тие додатоци не се опасни, но го заземаат местото на здравите состојки и ги разблажуваат нутритивните својства на храната.

Најчести дилеми

• Колку треба бебето да изеде за еден оброк?

Иако препораките на педијатрите се различни, родителите треба да му дозволат на доенчето само да одлучи колку ќе изеде. Улогата на родителите е да изберат што ќе јаде бебето, а бебето само ја одредува количината.

• Дали количината на витамини е иста во индустриските кашички и кашичките направени во домашни услови?

Нутритивниот состав е отприлика сличен – што покажуваат многу студии. Тоа е заради тоа што овошјето и зеленчукот се процесираат веднаш по бербата, па нема време да се изгуби нутритивната вредност. Процесот на обработка тече брзо, а еднаш спакувани во тегличка, состојките потешко ја губат нутритивната вредност отколку кога стојат свежи подолго време – бидејќи не се изложени на воздух, кој е еден од разградувачките фактори.

Дали оброците подготвени во домашни услови се похранливи од купечката храна?

Секако, вкусот на домашно подготвената храна секогаш ќе биде посупериорен. Очигледната предност на направените кашички е што го знаете точниот сооднос на состојките во неа, како и склоноста на Вашето бебе кон одредени производи. Ако обезбедите свежа храна додека бебето е мало, ќе формирате вкус кај детето повеќе да сака домашно подготвена и свежа храна и подоцна во животот. Подготовката на храната дома ќе Ви овозможи подоцна да додавате и зачини, да комбинирате вкусови, правејќи го оброкот на бебето неодолив.

Кога Вашето мало дете ќе порасне и ќе почне да јаде со остатокот од семејството продолжете да подготвувате вкусна храна од продуктите кои се на располагање во таа сезона. Подготовката на храната дома обезбедува најдобро можен нутритивен состав и потполна контрола  над бебешката исхрана.