Изгореница кај дете

/11 /11

Како родител или старател, важно е да знаете како да препознаете различни степени на изгореници, како правилно да ги третирате и најважно како да ги превенирате заштитувајќи го здравјето на вашето дете.

Степени на изгореници

Изгорениците се делат на три основни степени, зависно од длабочината и сериозноста на повредата:

• Прв степен. Го зафаќа само горниот слој на кожата (епидермис). Кожата е црвена, болна и сувa, без појава на меури. Пример е сончевата изгореница.
• Втор степен. Зафаќа подлабок слој од кожата (дермис). Се појавува црвенило, болка и меури исполнети со течност. Ова е поинтензивна повреда која бара повеќе внимание.
• Трет степен. Ова е најтежок степен кој ги зафаќа сите слоеви на кожата и понекогаш и подлабоките ткива. Кожата може да биде бледа, сувa или карактеристично зацрвенета со изглед на „изгорена кожа“. Ова е итна медицинска состојба.

Како да постапите при изгореница?

Прва помош:

1. Прекинете го изворот на топлина така што ќе го отстраните детето од опасната зона.
2. Веднаш исплакнете ја изгореницата со млака или ладна вода, 10-20 минути. Никогаш не користете мраз директно на кожата.
3. Не ги пукaјте меурите бидејќи тие се природна заштита на кожата и нивното пукање може да доведе до инфекција.
4. Покријте ја раната. Користете стерилна газа или чиста крпа за да ја покриете раната без да ја притискате.
5. Доколку е потребно, дајте лекарства против болка според возраста и препораките на лекар.
6. Ако изгореницата е од втор или трети степен на голема површина, ако е на лице, раце, стапала, или ако детето покажува знаци на шок, веднаш побарајте медицинска помош.

Кога да посетите доктор?

• Ако изгореницата е од втор или трети степен и ако е поголема од 5 см кај мали деца.
• Ако изгореницата се наоѓа на чувствителни делови (лице, очи, уши, гениталии).
• Ако детето има силна болка, треска или раната се инфицира (се појавуваат црвенило, оток, гној).
• Ако детето покажува симптоми на дехидрација или слабост.

Превенција на изгореници кај деца

• Средината каде се наоѓа детето да биде без опасни предмети и течности кои се врели.
• Не оставајте врела храна, пијалаци или апарати на дофат на децата.
• Објаснете им ги на децата опасностите од оган, врела вода и електрични уреди.
• Користете детски заштитни огради и капаци на приклучоци.
• Бидете внимателни при готвење и користете ги задни рингли на шпоретот.

Изгорениците кај деца бараат брза реакција и правилна нега за да се избегнат компликации како инфекции и лошо заздравување. Најдобрата заштита е превенцијата и образованието на целото семејство за безбедна околина. Ако дојде до повреда, не двоумете се да побарате медицинска помош.