Фото:Canva/Оофоритисот е воспалителна состојба која најчесто се јавува кај жени во репродуктивниот период и може да влијае врз репродуктивното здравје, менструалниот циклус и општото благосостојба доколку не се открие и лекува навреме.

/11 /11

Иако понекогаш започнува со благи симптоми, доколку не се лекува навреме може да доведе до сериозни компликации, вклучително и проблеми со плодноста.

Што претставува воспалението на јајниците?

Оофоритисот е воспалителен процес на еден или двата јајника. Често не се јавува самостојно, туку како дел од пелвична воспалителна болест, при што инфекцијата се шири од вагината и матката кон јајцеводите и јајниците.

Причини за воспаление на јајниците

Најчестите причини се:

• бактериски инфекции како кламидија, гонореја, стрептококи и слично,
• инфекции по гинеколошки интервенции,
• сексуално преносливи инфекции,
• ослабен имунитет,
• нелекувани вагинални или уринарни инфекции.

Симптоми што не треба да се игнорираат

Симптомите може да бидат различни по интензитет како:

• болка во долниот дел на стомакот, еднострана или двострана,
• болка при сексуален однос,
• зголемена телесна температура,
• неправилен менструален циклус,
• необичен вагинален исцедок,
• општа слабост и замор.

Кај некои жени, симптомите може да бидат благи, но инфекцијата сепак да напредува.

Како се дијагностицира?

Дијагнозата вклучува: гинеколошки преглед, ултразвучен преглед, лабораториски анализи (крв, брисеви) и тестирање за сексуално преносливи инфекции. Раната дијагноза е клучна за успешно лекување.

Зошто навременото лекување е важно?

Нелекуваната упала на јајниците може да доведе до:

• хронична болка во карлицата,
• формирање на адхезии,
• оштетување на јајниците и јајцеводите,
• намалена плодност или стерилитет,
• зголемен ризик од ектопична бременост.

Како се лекува?

Лекувањето зависи од причината, но најчесто вклучува: антибиотска терапија, одмор и мирување, аналгетици по препорака на лекар и избегнување сексуални односи за време на терапијата. Важно е терапијата да се заврши целосно, дури и ако симптомите исчезнат порано.

Може ли да се забремени по воспаление на јајници?

Во многу случаи може, особено ако воспалението било откриено и лекувано навреме. Кај жени со повторливи или нелекувани инфекции, може да има последици врз плодноста, па затоа редовните гинеколошки контроли се од исклучително значење.

Како да се заштитите?

За заштита од овие воспаленија потребно е да правите редовни гинеколошки прегледи, да имате заштитени сексуални односи, да се грижите за вашиот имунитет, а ако веќе се открие воспаление на јајниците или било какви инфекции кои водат до тоа навремено да се побара помош и да се лекуваат.

Воспалението на јајниците не е состојба што треба да се игнорира или состојба за која треба да мислиме дека ќе помине сама по себе. Раното препознавање и соодветното лекување ја штитат не само моменталната состојба, туку и репродуктивното здравје на жената на долг рок.