Информации и совети за новите родители

/11 /11

Заминувањето дома од породилиште е многу возбудливо, но може и да е стресно да се отпочне самостојна грижа за бебето без помош на болничкиот персонал. Во овој период ви е од огромно значење помошта на вашиот партнер и семејството. Колку повеќе имате помош и поддршка, толку подобро за вас и за вашето бебе.

Грижа за мајката

После породувањето кај мајката настапува периодот на пуепериум (леунство) кој трае 6 недели.

Во овој период:

• настанува повлекување на сите промени на телото кои настанале во текот на бременоста, пред се намалување на матката и родилниот канал и враќање во состојба како пред забременувањето

• се појавува обилен вагинален исцедок, т.н лохии кој може да трае до 6 недели; секоја промена на изглед, мирис, траење може да е знак за инфекција - потребен е лекарски преглед- (во овој период не се препорачува употреба на тампони)

• се воспоставува лактацијата/доењето

• се јавува променливо расположение поради падот на нивото на хормоните

• изостанува менструално крварење; првата редовна менструација може да се очекува 6 недели после породувањето, но кај оние кои дојат, дури после една година. Иако овој период е исклучително осетлив за мајката, посебен медицински третман не е потребен.

Редовниот гинеколошки преглед треба да се направи 30 - 40 дена после породувањето кога гинекологот ќе ја утврди општата состојба, состојбата на дојките, брадавките и матката.

Итна посета на гинеколог е потребна доколку ги приметите следниве симптоми:

• Обилно крварење кое трае подолго од 10 дена

• Отежнато дишење и болка во градниот кош

• Болка во долниот дел на стомакот

• Воспаление и болка во перинеалниот предел (помеѓу вагиналниот и аналниот отвор)

• Воспаление- мастит (болка и оток во дојките)

• Покачена температура над 38 Ц, забрзан пулс

• Отежнато или намалено мокрење

• Болка во потколениците

• Изразена депресија

Општи препораки

• Мајките се исцрпени со породувањето и губитокот на крв, поради што е потребен одмор, редовна и разновидна исхрана и доволен внес на течности што ќе ги отстрани симптомите на лесна анемија.

• На сите доилки се препорачува рано станување од кревет и движење, освен во случаи на тешко или оперативно породување. Не се препорачува тешка физичка работа.

• Мајката во првите денови треба да јаде лесно сварлива храна, претежно млечна храна, храна богата со витамини, варен зеленчук и месо, младо сирење, компоти, свежо овошје. После четвртиот ден постепено се враќа на нормална исхрана, освен доколку не постојат причини за посебна исхрана.

• Потребна е течна исхрана, редовно празнење на црева и редовна тоалета за да се намали можноста од појава на тврда столица и хемороиди.