На гости кај “ Next time” (прв дел)  

Рингераја продолжува да ги посетува семејствата на нашите познати, и овој пат решивме тоа да бидат евровизиските претставници “Next time”. Секогаш насмеани, со позитивна енергија, со некој посебен шарм, даден од Бога, го прифатија разговорот, а нормално и мама Сузе која кога ја контактиравме беше толку пријатна за разговор, што истиот момент ни беше јасно од кого Мартин и Стефан наследиле многу работи. Уште една потврда дека  децата се огледало на родителите.

 

Разговорот го започнавме со мама Сузана :

Честопати ми го поставувале ова прашање моите блиски пријатели, веројатно затоа што е невообичаено, симпатично, а сепак прекрасно да се има две бебиња во исто време! Навистина јас до седмиот месец, не знаев дека ќе родам близнаци. Кога ја разбрав веста од докторот дека ќе имаме уште две дечиња  и тоа во исто време, бев пресреќна. Зарем  има некој кој би се чувствувал поинаку? Инаку  Мартин и Стефан имаат уште еден постар брат Филип.

Па, да близнаци имавме и од едната и од другата страна на семејствата.

Како и секоја трудница, првата бременост се памети по тоа  што е прва и затоа што се поминува со многу повеќе страв и  трепет , за тоа дека треба да се вним ава на се, меѓутоа веќе во  втората, па и третата се е поедноставно. Можеби затоа обично мајките јадат многу повеќе од потребното, добиваат непотребни килограми итн. Со првиот син Филип се поправив навистина многу повеќе од килограмите што ги добив со Мартин и Стефан.

Не воопшто, јас по природа не сум плашлива личност, а особено не се плашев за тоа дека ќе треба да одгледувам три мали дечиња (на скоро иста возраст). Љубовта кон децата и радоста што ја носат тие е нешто што останува и што ти дава сила за се во животот.

Многу Ви благодарам за прекрасните зборови! Ова е нешто што секој родител сака да го слушне, а особено ако е тоа навистина  така. Слободно можам да кажам дека сум Горда на моите три синови. Методи и политики нема, веројатно постои нешто што останува како наследство од родителите. Како и да е постои една голема работа која што ниту еден родител не смее да ја заборави, а тоа е дека  со децата мора да бидеш секогаш пријател, тие мора да сватат дека ги почитуваш и ги разбираш.

Најголемата помош ја добивав од моите родители, на кои јас денес јавно им изразувам  голема благодарност, можеби затоа што родителите на сопругот беа малку подалеку... меѓутоа  постоеја и јасли, градинки и забавишта. Мартин и Стефан беа многу мирни бебиња. Незнам, понекогаш се прашувам дали заборавив на сите  потешкотии во животот  врзани за нивниот развој или пак преголемата мајчинска љубов што ја имам кон моите деца ме направи силна и јака, одлично да ги решавам сите работи? Се сеќавам на сите убави работи и за се што е врзано за сите три деца. Особено интересно, а  што е врзано за Мартин и Стефан е нивното проодување. Можеби е чудно но тие проодеа на 11 месеци во ист ден и во ист момент. Тоа никако нема да го заборавам кога ги подадоа рачињата еден кон друг и зачекорија....

За тоа дали наоѓав време за себе, со задоволство можам да кажам дека никогаш не се запоставив. За се има време само ако се сака.

Па да , многу се промени добивме голема радост во семејството !

Ова е многу симпатично прашање! И ден денес неможам да се начудам како тоа тие двајца се разбираат и се надополнуваат, а во ниеден момент не изразуваат исти желби и потреби. Во еден момент едниот сака работи што пред некое време ги сакал другиот и слично.

Повторно Ви благодарам ако така мислите, меѓутоа има нешто од Бога што е дадено и што никој не може да го предвиди  колку и да се труди. Мојата љубов, како и љубовта на секој родител кон своето дете е голема, сепак мислам дека има нешто што треба и требало да се случи.

Незнам, мислам дека нема некоја голема разлика во начинот и методот на воспитувањето. Поинакви се само околностите во кои што растат и се развиваат децата. Како и да е нашите родители не воспитувале во поинакви услови од овие во кои што ние ги воспитуваме нашите деца. Сега е се поинаку, па и самите ние сме поинакви и со поинакви услови на егзистирање. Темпото на живот  е позабрзано но и посовремено. Тоа не значи дека сепак децата и родителите треба да се оддалечуваат, напротив уште повеќе е потребан љубовта и поддршката од семејството. Во едно здраво семејство сите работи се поедноставни!

Странава Ви е навистина одлична!!! Јас сега за прв пат се вклучив на порталот за да Ве запознаам и можам да кажам дека младите мајки имаат среќа што постојат многу начини да бидат информирани особено преку вашето богатство на информации. Во времето кога јас ги чував моите деца за жал немаше интернет портали - најбрз начин на едукација. Ви посакувам многу успех и да останете постојани во ова што сега го работите. Честитки!

Се она што ни го открија Мартин и Стефан за себе, за своето детство, игри, првиот бакнеж, ќе можете да прочитате следната недела... До тогаш, поздрав од Тимот на Рингераја.