Фото:Canva/Утринската мачнина може да биде природен начин на телото да го заштити бебето во развој.

/11 /11

Таа е еден од најчестите симптоми во бременоста се појавува кај речиси 80% од трудниците.

Иако може да биде напорна, исцрпувачка и некогаш фрустрирачка, одредени научни истражувања покажуваат дека утринската мачнина има важна заштитна улога и за мајката и за бебето. 

Наместо да ја гледаме само како непријатност и состојба која ни го пореметува секојдневието за време на бременоста, вреди да разбереме зошто се јавува и што значи за развојот на плодот.

Зошто се јавува утринска мачнина?

Во првите недели од бременоста, нивото на хормоните hCG, естроген и прогестерон нагло се зголемува. Овие хормони се клучни за развој на плацентата и одржување на бременоста, но истовремено делуваат и на делот од мозокот што го контролира чувството на мачнина.

Со други зборови, телото на трудницата се прилагодува за да го заштити бебето, а појавувањето на мачнините се дел од тој процес.

Како утринската мачнина го штити бебето?

1. Ја намалува веројатноста за внесување штетни материи

Мачнината и чувството на одбивност кон одредени намирници како што се: месо, кафе, јајца или пржена храна, можат да бидат инстинктивен механизам за избегнување на храна што може да содржи бактерии или токсини.
Ова е особено важно во раната бременост кога се формираат мозокот, срцето и органите на бебето.

2. Понизок ризик од спонтан абортус

Студиите покажуваат дека жените кои имаат утринска мачнина имаат помала веројатност за рана загуба на бременоста. Тоа е знак дека хормоните функционираат правилно и дека бременоста се развива стабилно.

3. Мачнините го поддржуват здравиот развој на плацентата

Зошто е ова вака? Хормоните што предизвикуваат мачнина истовремено ја зајакнуваат плацентата. Па следствено, колку е плацентата посилна, толку е бременоста побезбедна.

Кога е мачнината нормална појава, а кога треба лекарски совет?

Нормалната мачнина се јавува во првиот триместар и доаѓа во бранови, а се олеснува со малку храна, вода или одмор

Но треба да се побара лекарска помош ако: не можете да задржите храна или течност во организмот(веднаш повраќате), губите телесна тежина, ако чувството трае цел ден и ако има знаци на дехидрација.

Ова може да укажува на состојба hyperemesis gravidarum. Оваа состојба е компликација во бременоста која се карактеризира со потешко гадење, повраќање, губење на тежината и евентуално дехидрација. Може да се појави и чувство на несвестица. Па затоа се смета за потешка форма на утринска мачнина која бара медицинска поддршка.

Како да ја ублажите утринската мачнина?

• Јадете почесто, но во мали количини.
• Започнете го денот со суви храна како крекери, тост и слично.
• Пијте мали голтки вода во текот на денот
• Чајот или бонбони со ѓумбир може да бидат од голема корист.
• Избегнувајте силни мириси и тешка храна.
• Одморајте се секогаш кога ќе можете бидејќи уморот може да ја влоши мачнината.

Иако е непријатна, создава нервоза, а и ја уморува трудницата, утринската мачнина често е знак дека бременоста се развива здраво.
Таа е доказ дека хормоните ја поддржуваат плацентата, го штитат бебето и го насочуваат организмот да избегнува потенцијално опасни материи.