/11 /11

Родителите кои имаат деца од училишна возраст, треба да организираат “семејни средби” на кои ќе се собира целото семејство и ќе се разговара за потенцијалните проблеми кои треба да бидат решени. Неопходно е јасно да се дефинираат проблемите во чие решавање еднакво ќе се вклучат сите членови. По дефинирање на проблемот, секој член на семејството треба да предложи еден или повеќе решенија без да ги коментираме предлозите на другите луѓе. Потоа да се оценуваат добрите и лошите страни на секој предлог и на крај да се избере најдоброто решение. Важно е да се сфати дека проблемот на еден член од семејството не е само негов личен проблем, туку проблем на целото семејство и поради тоа во неговото решавање треба да се вклучат сите членови на семејството.

Родителите на мали деца и родителите на децата на предшколска возраст ќе имаат проблем при вклучување на децата на оваа возраст во овие семејни состаноци и дискусии, па затоа им се советува да поминат квалитетно време со децата за да не се почувствуваат запоставени и исклучени.  Тоа значи дека на детето треба во текот на денот да му обезбедите време кое ќе му го посветите целосно на него. За тоа време детето мора да биде сигурно дека ќе го има едниот или двајцата родители за игра, прашања, галење, гушакње, односно дека ќе го има целото нивно внимание само за себе. Доколку ова му го обезбедиме на детето, можеме да бидеме сигурни дека тоа нема да се обиде да го привлече вниманието со недолично однесување – викање, плачење, скокање и лупање со нозете.

Многу е важно времето кое го поминувате со детето да биде квалитетно искористено, бидејќи не е доволно да бидат родителите со детето долго време, туку тоа време најдобро да се искористи. Во тоа време кога си играат со своето дете, родителите не треба да гледаат серии, да не разговараат долго меѓу себе и времето кое е наменето за детето да не го користат за одење на гости. Квалитетно поминатото време со своето дете е најдобро секогаш да биде во исто време од денот, но доколку тоа е невозможно, на детето треба да му се каже за промените кои настанале и да се одржи ветувањето за променетото време. Обично не е добро да им се ветуваат работи на децата кои не можат да се одржат или исполнат, бидејќи можеме да ги изневериме, а сето тоа ја поткопува самодовербата на децата.

Не мора да бидете секогаш тука, важно е да му дадете внимание на детето и поддршка и детето да знае дека секогаш може да смета на вас, односно дека секогаш сте тука за него.