Фото:Canva/Полово преносливите инфекции често може да поминат без симптоми, но навременото тестирање и соодветната терапија се клучни за спречување на сериозни здравствени компликации.

/11 /11

Дел од нив можат да поминат без симптоми, но ако не се дијагностицираат и лекуваат навреме, можат да предизвикаат сериозни здравствени последици.

Информираноста, редовните тестирања и одговорното однесување се клучни за заштита на сопственото здравје и здравјето на својот партнер.

Најчести полово преносливи инфекции

1. Chlamydia trachomatis infection (Кламидија)

Ова е една од најчестите бактериски инфекции, особено кај млади лица.

Симптомите се: болка при мокрење, необичен исцедок, болка во долниот дел на стомакот, а честопати може да биде и без симптоми.

Оваа инфекција се третира со антибиотици. Важно е и партнерот да биде тестиран и лекуван.

2. Neisseria gonorrhoeae infection (Гонореја)

Ова е бактериска инфекција што може да ги зафати гениталиите, ректумот и грлото.

Симптомите се: печење при мокрење, гноен исцедок и болка во карлицата.

Лекувањето на оваа болест е со комбинирана антибиотска терапија. Поради појава на резистентни соеви, терапијата мора да биде препишана од лекар.

3. Human papillomavirus infection (ХПВ)

Ова е најчеста вирусна сексуално пренослива инфекција.

Симптомите се генитални брадавици, а многу често е и без симптоми. Одредени типови на оваа инфекција се поврзани со рак на грлото на матката.

Нема лек што го елиминира вирусот, но брадавиците се третираат локално. Постојат вакцини што штитат од најризичните типови.

4. Herpes simplex infection (Генитален херпес)

Предизвикан е од вирусот HSV.

Симптомите се: болни меурчиња или ранички, чешање и печење и повремени рецидиви

За лекување се користат антивирусни лекови што ги намалуваат симптомите и ја скратуваат епизодата, но вирусот останува во организмот.

5. Syphilis (Сифилис)

Ова е бактериска инфекција што се развива во фази.

Симптомите се: појава на безболна раничка во раната фаза на болеста и осип по телото.

Ако не се лекува може да дојде до сериозни оштетувања на органите.

За лекување, пеницилинот е стандардна терапија, особено ефикасна во раните фази.

6. HIV infection (ХИВ)

Ова е вирус што го напаѓа имунолошкиот систем.

Почетните симптоми се слични на грип, а подоцна доаѓа до ослабен имунитет.

Не постои лек што целосно го елиминира вирусот, но современата антиретровирусна терапија овозможува долг и квалитетен живот.

Зошто раната дијагноза е клучна?

Многу од овие биолести можат да поминат без симптоми. Нелекуваните инфекции можат да доведат до: неплодност, хронична болка, компликации во бременост, како и зголемен ризик од други инфекции.

Редовното тестирање е најсигурниот начин за рано откривање.

Превенцијата е најдобрата заштита

-        Користење кондом при секој сексуален однос. 

-        Ограничен број сексуални партнери. 

-        Редовни гинеколошки и уролошки прегледи. 

-        Вакцинација против ХПВ. 

-        Отворена комуникација со партнерот. 

Кога да посетите лекар?

-        Ако имате необичен исцедок.

-        Појава на болка или печење при мокрење.

-        Ранички, осип или брадавици.

-        По незаштитен сексуален однос.

Никогаш не практикувајте самостојно лекување. Точната дијагноза бара лабораториски тестови и стручна проценка.

Полово преносливите болести се чести, но во голем дел се излечиви или контролирани ако се откријат навреме. Свеста, одговорноста и редовната проверка се најдобрата стратегија за заштита на репродуктивното и општото здравје.