/11 /11

Италија е една од ретките земји кои знаат да пленат и да го освојат срцето на секој кој ќе ја посети, кој ќе ја запознае или едноставно ќе го изговори нејзиното име. ITALIA! Бидејќи во нејзиното име вешто се сокриени нејзините лица: историја, јазик, култура, уметност...

I - Impero = Империјата која оставила длабоки траги во италијанската историја, култура, уметност со центар - градот Рим. Тие траги и ден денес му се спротивставуваат на заборавот, издигнувајќи се во самиот центар на Рим а оттаму, во самиот центар на Италија: Форумите - политичко - религиозни центри, Колосеумот - амфитеатар, Портите - Арки кои сведочат за императорските триумфи .

T - Tortellini, Tagliatelle, Tiramisu? = Италијанската кујна е една од најпознатите кујни во светот особено нејзините тестенини, сирења, слатки, вина и секако пицата за која Италијанците гордо тврдат дека е нивен изум кој му го подариле на светот. Ние може само да им се заблагодариме за тортелините, моцарелата, пицата, сладоледот...

A - Arte = уметноста на Апенинскиот Полуостров на кој се простира Италија датира уште од праисторијата. За време на Римската Империја Италија била центар на уметноста во тој дел од Медитеранскиот базен. Но најверојатно е дека италијанската уметност станала највлијателна во периодот на ренесансата (14 век) благодарение на ремек делата на Леонардо Да Винчи, Микеланџело Буонароти на кои и ден денес им се восхитуваме во Фиренца, Рим, Ватикан ...

L - Lingua = јазикот е еден од главните обележја на италијанската цивилизација. Наследник на совршениот латински јазик од некогашната Римска Империја, италијанскиот јазик се издвоил по својата едноставност и милозвучност поради што станал моќно средство за создавање на книжевни ремек дела како оние на Данте Алигиери, Франческо Петрарка, Џовани Бокачо итн.

I - Italiani = Италијанците се срдечни, весели, зборлeсти....убави! За ваквиот впечаток во светот и низ времето, се погрижија комедијантите, актерите кои го освојуваат светот: Роберто Бењини, Софија Лорен, Федерико Фелини, Ана Мањани, Марчело Мастројани…

A - Amore= љубовта е најискреното чувство кое го придвижува животот насекаде низ Италија: во гондола, возејќи се низ тесните канали на елегантната Венеција; на терасата на Јулија во скромната Верона; во барка, возејќи се под вулканот Везув долж неаполската ривиера; на опера во една од ложите на миланската Скала; под куполата на Брунелески во Фиренца или пред раскошната Фонтана ди Треви во Рим.