Бебе

/11 /11

Родителите често се прашуваат: што сонува моето бебе? Дали нивниот сон е само биолошка потреба, или зад тие ситни движења се крие цел еден свет?

Соништата пред зборовите

Научниците докажале дека уште од раѓање, бебињата поминуваат значителен дел од спиењето во фаза наречена REM, периодот кога кај возрасните се појавуваат најживописните соништа. Но, за разлика од возрасните, чие секојдневие и веќе стекнато животно искуство доведува до интензивни со настани соништа мозокот на бебињата сеуште не е преполн со слики, зборови и искуства. Па затоа, тие не сонуваат сцени со дијалог, туку чувства. Мирисот на мајката. Топлината на прегратката. Звукот на срцето кое веќе го препознаваат.

Соништа од срце, не од ум

Бидејќи бебињата сеуште не развиле симболично мислење, нивните соништа не се „приказни“, туку емоционални слики: магла од светлина, тонови и сензации. Едноставно замислете ги како платно насликано со чиста уметност: апстрактна, топла, искрена. Некои истражувачи претпоставуваат дека бебињата ги „преживуваат“ дневните доживувања во сон, што значи дека првиот поглед, допирот на кожата или светлото што првпат го виделе се враќаат ноќе, како ехо.

Соништа што го обликуваат мозокот

Сонот кај бебињата не е само одмор, туку и алатка за развој. Во текот на спиењето, мозокот на новороденчето создава нови невронски врски, обработува информации и создава основи за идно учење. Нивните сништа се како тивок разговор меѓу телото и умот, разговор што ќе влијае врз тоа како ќе гледаат на светот утре.

Мит или вистина: дали бебињата сонуваат ангели?

Многу култури веруваат дека бебињата сонуваат ангели, токму поради нивната недопрена невиност. Некои родители раскажуваат дека нивните бебиња се будат насмеани, како да се сретнале со нешто прекрасно. Иако науката не може да го потврди ова, самата мисла дека бебињата можеби сонуваат нешто подуховно од нас, нè инспирира да го зачуваме нивниот мир.

Во светот на соништата, бебињата не зборуваат, но чувствуваат. И токму тие чувства се најчистата форма на постоење.