/11 /11

Лукот во минатото

Луѓето порано го сметале лукот дека е спасоносен во време на епидемиите од чума. Верувале во митот дека ако закачат венец од лук на вратата, чумата ќе ги одмине.

За време на Божиќ на дечињата врз облеката им закачувале главица лук, да бидат здрави и да ги чува од лошите сили.

За време на војните, во минатото, лукот го користеле како средство против гангрена.

Лукот денес

Денес, пак, ова чудо на природата се користи како за лекување, така и за спречување на безброј здравствени проблеми – почнувајќи од високиот холестерол, се до обичната кашлица.

Природен антибиотик

Лукот е најпопуларен по својството да биде природен антибиотик. Уште во 19 век Луј Пастер го испитувал антибиотското својство на лукот во лабораториски услови, за денес многу современи научни испитувања да го потврдат тоа.

Анализите посочуваат дека во споредба со некои антибиотици, лукот има поширок спектар на дејство.

Антибактериските својства на лукот се должат на состојката АЛИЦИН, која за жал се уништува од високата температура при готвењето.

Влијае врз крвниот притисок

Познато е дека лукот помага во справувањето со нестабилноста на крвниот притисок. Научно е докажано дека лукот го намалува крвниот притисок. Тоа својство се должи на сулфидите во него, кои не се уништуваат при термообработка.

Лекува забна болка

Хипократ го препорачувал лукот против забна болка. Некои методи во народната медицина укажуваат на користење надворешни облоги од лук, но подобро дејство се постигнува кога лукот е поставен директно врз болниот заб.

Причината поради која лукот ја намалува болката се должи на состојката алицин, која го спречува развојот на бактерии во устата и болниот заб, но сепак не може да го спречи развитокот на кариес.

Важно:

За да бидете сигурни во ефективноста на лукот, најпрво излупете го и убаво истолчете го. Со тоа ќе се осигурате алицинот да делува директно.

Алицинот е сложена хемиска состојка – нестабилно соединение кое брзо се распаѓа. Колку е постар лукот, толку е помало количеството алицин.

А што со лошиот здив потоа?!?

Многумина го избегнуваат консумирањето лук поради непријатниот здив и вкус во устата. Бактеријата, која го предизвикува лошиот здив може лесно да се отстрани со обични хигиенски методи – редовно миење на забите и јазикот.

Друг начин да се отстрани непријатната миризба е по консумирањето лук да јадете свеж магдонос. Не е случајно што во рецептите каде се користи лук, присутен е и магдоносот. За да има целосен ефект магдоносот треба да се џвака.

Лошата миризба не мора да биде проблем

Најсигурен начин да го решите проблемот со лошиот здив од лукот е консумирањето во друштво на пријатели, љубители на ова чудо на природата.

Поголем проблем може да биде миризбата од лук која останува на рацете, но тоа лесно се решава со миење на рацете со сок од лимон.

д-р Фросина Дајо

доктор по општа стоматологија