Тато, играј со мене!
Таткото има поинаков пристап спрема доенчето, отколку мајката. Поинаков е неговиот начин на тешење, на игра, накратко, моментите поминати со таткото се различни од моментите поминати со мајката. Така и треба да биде. Со тоа доенчето ја учи разнообразноста на социјалните контакти и емоционалниот одговор кон нив.

Поминувајте што повеќе време со вашето мало богатство, а во меѓувреме мамичка нека си посвети неколку моменти себе си. Бидете му партнер на доенчето при откривањето на светот и потрудете се да му покажете што повеќе работи низ игра. Погрижете се за сигурна околина и сите потенцијално опасни работи и драгоцени предмети оставете ги на сигурно – вон негов дофат.

Прошетка на свеж воздух ќе ви годи и Вам и на Вашето дете. Може да се одлучите за прошетка со количка, доенчето може да го носите наоколу со кенгур, а на кратка прошетка можете да отидете со него во прегратка.

Сакате ли да уживате во насмевката на доенчето?

Тој прекрасен звук ќе го измамите со нежно скокоткање или дување на стомачето. Забавувајте го со пеење, музика и игра или со читање на сликовница. развеселете го со покажување на различни предмети и играчки. Вистинско време за забава е и времето за бањање. Тогаш оставете го да шлапка и удира со ножињата.

Соодветни играчки

Доенчето во овој период почнува само да ги зема играчките. Сака шарени играчки, а посебно такви кои при допир предизвикуваат звукови. Изберете ѕвечалки и играчки со контрастни бои. Погрижете се да бидат од различен материјал, што ќе го изостри сетилото за допир на доенчето. Понудете му сигурни играчки кои може да ги гризе и слободно да ги истражува.

Внимавајте играчките да бидат што почисти. Мораат да бидат сигурни, без мали делчиња кои можат да се извадат или откинат (постои опасност од гушење и голтање), без остри рабови и направени од безбеден материјал.

Моето доенче
Развојни фази
Доење и дохрана
Спиење
Здравје и нега
Си играме