Фото:Canva/Секое бебе има свој ритам. Овие знаци не значат автоматски проблем, но се причина за разговор со педијатар. Раната реакција носи најдобри резултати.

/11 /11

Секое бебе има свое темпо на раст и развој. Некои проодуваат порано, други подоцна. Некои брзо добиваат тежина, други поспоро. Но постојат одредени сигнали што не треба да се игнорираат.

Овој текст не е за создавање паника, туку за препознавање кога е потребна дополнителна проценка.

1. Недоволно зголемување на телесна тежина

Во првите месеци, бебињата треба постепено да напредуваат според растежните криви.

Алармантни знаци на кои треба да внимавате се:

• губење тежина по првите 10 до 14 дена,
• престанок на зголемување на тежина неколку недели по ред,
• паѓање на тежината под растежната крива.

Ова може да укажува на проблем со хранење, апсорпција или некоја здравствена состојба.

2. Недостаток на контакт со очи по 2риот-3тиот месец

Бебињата околу оваа возраст почнуваат да следат лица, да воспоставуваат контакт со очи и да реагираат на насмевка.

Ако овие дејствија изостануваат, потребна е проценка.

3. Нема социјална насмевка до 3тиот месец

Социјалната насмевка е важен развоен показател. Не се однесува на рефлексна насмевка во сон, туку на одговор на лице или глас.

4. Нема реакција на звук

Бебето треба да се стресе на гласен звук и да го сврти главчето кон глас. Отсуство на ваква реакција може да укажува на проблем со слухот.

5. Многу слаб мускулен тонус или претерана вкочанетост

Ако бебето изгледа млитаво кога го држите, не може да го контролира држењето на главата по 4тиот месец или има постојано вкочанети раце или/и нозе потребна е консултација.

6. Не постигнува пресвртници во развојот на моториката

Општи насоки во овој поглед се:

• самостојно и цврсто држење на главата која се случува околу 3тиот-4тиот месец,
• превртување околу 4тиот-6тиот месец,
• седење со поддршка кое се случува околу 6тиот месец.

Доцнењето со некоја од овие насоки во развојот само по себе не значи проблем, но комбинација со други симптоми бара проверка.

7. Проблеми со хранење

Симптоми како: постојано повраќање, одбивање храна, често гушење и многу долг оброк при кој бебето се заморува можат да влијаат на растот.

8. Прекумерна летаргија или невообичаена раздразливост

Бебе кое тешко се буди, не реагира на стимулација и плаче постојано без утешување треба да биде прегледано.

9. Губење на веќе стекнати вештини

Ова е еден од најважните сигнали. Ако бебето престане да прави нешто што претходно го можело како насмевнување, гугање, движење и слично, потребна е итна лекарска проверка.

Што е важно да знаете?

-        Секое бебе има свое темпо на раст и развој.

-        Малo доцнење со некоја од основните активности при развој само по себе не значи постоење на некоја состојба и дијагноза.

-        Сепак раната проценка носи подобра поддршка и исход.

Кога да се јавите кај педијатар?

-        Ако имате родителска интуиција дека нешто не е во ред.

-        Ако има повеќе од еден алармантен знак.

-        Ако напредокот е значително под очекуваното.

Родителската загриженост никогаш не е непотребна.

Најголемата предност на раното детство е пластичноста, мозокот и телото брзо учат и се адаптираат. Затоа раното препознавање и навремена поддршка при одредени ситуации прават огромна разлика.

Подобро е да прашате и да добиете уверување, отколку да чекате во неизвесност.