/11 /11

За нормална телесна тежина се смета онаа меѓу 2.812 и 4.173 грама, иако идеалната телесна тежина би била онаа околу 3.500 грама. Децата родени со таа телесна тежина имаат помал процент на смртност, помалку телесни и душевни оштетувања, помалку тешки болести во детството и подобар почеток на животот отколку децата родени со ниска родилна тежина.

Повеќето бебиња родени во термин (меѓу 37. и 41. недела) ќе бидат тешки меѓу 2.812 и 4.173 грама и ќе бидат долги меѓу 48 и 53 cm.  Детето може да биде помало или поголемо од наведените вредности и понатаму да биде со добро здравје, бидејќи големината на детето зависи од конституцијата на мајката, од фамилијарната анамнеза и генетика. Дали Вашето дете расте и се развива правилно, ќе Ви каже Вашиот педијатар.

Повеќето бебиња, во неколкуте денови по раѓањето, ќе изгубат во тежина, обично 300 – 500 грама. Тоа се случува заради размената на течности во детскиот организам и навикнувањето на нов начин на исхрана и тоа не претставува причина за грижа. Но ако детето изгуби повеќе тежина значи дека постои некој проблем и тогаш треба да се посоветувате со педијатар.

Тежината на бебето е добар индикатор за неговото здравје така што растот во тежина ќе биде внимателно надгледуван од Вашиот педијатар. Детето кое има правилен прираст во тежина во главно нема здравствени проблеми.

Бебињата родени со помалку од 1.500 грама се бебиња со исклучително ниска тежина на раѓање. Само 1.5% од вкупно родените бебиња се раѓаат со оваа тежина.