/11 /11

Доколку го доите бебето

Ова е идеална ситуација, како за бебето така и за мајката, бидејќи не мора да се грижи за стерилни садови и адекватни услови за подготовка на оброк за бебето. Доволно е мајката да води сметка за својата исхрана и пред се, за внесувањето на доволна количина на течности, за да може безгрижно  да го поминува времето во шетање со бебето. Оброкот се подготвува сам, во стерилни услови, на идеална температура. Се чека само бебето да каже дека е гладно.

Како да го чувате млекото?

Доколку е неопдходна кратка разделба меѓу мајката и бебето, решението е да измолзите и да оставите млеко, кое некој друг ќе му го даде на бебето. Во првиот месец, додека се воспоставува лактација и додека мајката и бебето учат правилно доење, се советува бебето да се дохранува исклучиво со лажиче. Подоцна, кога тимот добро ќе се извежба, може да се користи и шишенце.

За измолзување користете рачна или електрична пумпица, која ќе ја стерилизирате пред секоја употреба, или тоа можете да го направите рачно, што е малку по комплицирано. Во секој случај, битно е млекото да се истиснува директно, во некој стерилен сад, а никако да тече по градите на мајката и да се собира во сад.

Самиот процес на измолзување не треба да трае подолго од 20 минути. Млекото може да се чува во обичен фрижидер 24 часа, или во замрзнувач 6 месеци. Не грижете се ако не измолзите голема количина на млеко, тоа е нормално, бидејќи вашиот организам произведува повеќе кога бебето цица.

За бебињата на млечна формула

Во овој случај ситуацијата е малку покомплицирана. Главна грижа е да се обезбеди доволен број на стерилни шишенца за подолго отсуство од дома. Млечната формула е фабрички спакувана, па лесно можете да ја носите со себе, а можете и да земете доза која ќе Ви иде потребна, па да ја ставите во стерилен сад. Превриената вода можете да ја користите 12 часа (ставена во термос). Ако Вашето бебе не го испие целото млеко, остатокот фрлете го.