Заби
Помеѓу 6. и 12. месеци, кога на детето ќе му израсне првиот заб, можете да посетите заболекар кој ќе ве посоветува во врска со правилната исхрана и хигиена и ќе ве предупреди што не треба да правите. Забите почнувате да ги чистите штом ќе пораснат. На почетокот користете мека крпа или газичка која ја натопувате во вода и ја обвиткувате околу прстот, или можете да користите гумен напрсток. Подоцна почнуваме да користиме четкица за заби за бебе, но без забна паста (повеќе за тоа прочитајте во претходните месеци).

Ако сеуште доите, немојте да престанувате заради никнувањето на забите. Ако детето Ве гризне, треба да знаете дека тоа не го прави намерно. Прекинете го доењето, во тој момент и кажете одлучно НЕ. Доенчето од Вашиот тон ќе сфати дека тоа што го направило не е добро.

Нега на болно дете

Болното дете е со полошо расположение, повеќе плаче, па затоа треба да бидеме внимателни и пострпливи од обично. Ако има висока температура не оставајте го само во неговата соба, туку направете му легло таму каде што вие се задржувате. Така нема да биде осамено и ќе го имате под постојан надзор. При висока температура е важно да не го прегревате со многу облека, или претопла соба. Тоа може да предизвика конвулзии. Треба да пие многу течности, а ако нема апетит не грижете се, важно е доволно да пие, за да не дехидрира.

Висока температура

Нормална телесна температура на детето е 37 C и повремено варира. Температурата е најчест симптом на болест кај децата кој се појавува и при заразни и при незаразни болести. температура треба да измериме ако детето ни се чини топло (тоа ќе го почувствуваме ако му го допреме челото) Мериме под пазуви, а не во уста (таму температурата е за 0,6 C повисока)

Високата температура е знак дека телото се бори со некаква зараза. Ја симнуваме со тоа што детето го облекуваме во потанка облека и го покриваме со лесна покривка. Собата треба да биде ладна, а на детето треба да му дадеме соодветна доза парацетамол. При висока температура повикајте го педијатарот на детето и посоветувајте се со него.

Што е парацетамол?

Парацетамол во облик на чепчиња, или сируп ја симнува покачената телесна температура и ги олеснува, т.е отстранува благите до умерени болки. Се користи кај доенчиња со температура и/или болки, на пр. кај покачена телесна температура, после вакцина, при грип, настинка, главоболка. Може да се добие во аптека без рецепт. Парацетамолот можете да го користите и во чепчиња, но не смеете да го дадете на детето заедно со други лекови кои содржат парацетамол. Контраиндикациите се ретки и обично благи, важно е пред употреба добро да го прочитате упатството за користење и доследно да го применувате.

За антибиотиците

Антибиотиците не делуваат против сите болести. Ги уништуваат бактериите, но не и вирусите, заради тоа мораме кај вирусните заболувања да чекаме едноставно да поминат. Препишаните лекови дозирајте ги по рецепт и немојте да ги мешате во пијалаци или храна.

Моето доенче
Развојни фази
Исхрана
Спиење
Здравје и нега
Добро е да се знае
Си играме