Фото:Canva/12 месеци љубов, смеа и чудесен раст.

/11 /11

Во дванаесеттиот месец, вашето малечко веќе не е беспомошно новороденче, туку активно, љубопитно и комуникативно суштество кое го истражува светот со сите сетила.

Физички развој - чекор до првите чекори

Во овој месец, повеќето бебиња: веќе стојат самостојно неколку секунди, се обидуваат да направат први чекори без потпора, сигурно ползат и се искачуваат на пониски предмети, ја подобруваат рамнотежата и координацијата.

Некои бебиња можеби ќе проодат токму сега, а други во наредните мес еци. Нема потреба да го споредувате вашето бебе со други бидејќи секое бебе има свој ритам на развој. Важно е да го поттикнувате, не да го брзате.

Когнитивен и емоционален развој

Вашето бебе сега разбира многу повеќе отколку што може да каже.

• Го препознава своето име и реагира на повици.
• Разбира едноставни инструкции, на пример: „дај ми ја топката“, „дојди кај мама“.
• Почнува да имитира звуци, движења и изрази на лицето.
• Ја разбира разликата меѓу блиски и непознати луѓе и може да покаже срамежливост или страв од странци.

Во оваа возраст, бебето развива сопствена волја. Почнува да покажува што сака и што не сака. Ова е првиот чекор кон независност, иако може да изгледа како „тврдоглавост“.

Развој на говорот

Некои бебиња веќе го изговараат првото „мама“ или „тата“ со вистинско значење. Други сеуште се на ниво на брборење.
Важно е постојано да зборувате со бебето, да му покажувате предмети и да ги именувате бидејќи така го поттикнувате јазичниот развој.

Исхрана во 12-тиот месец

До крајот на првата година, бебето веќе има јасно развиени вкусови.

Може да јаде мали парчиња храна како варен зеленчук, овошје, житарки, пилешко, риба (без коски). Но важно е да продолжи со мајчино млеко или адаптирано млеко, бидејќи тоа сè уште обезбедува клучни хранливи материи.

Во оваа фаза избегнувајте да му давате на вашето бебе сол, шеќер и преработена храна.

Исто така, оставете го бебето да се обиде само да јаде. Можеби ќе има неред, но така учи за вкус, текстура и самостојност.

Спиење и рутина

Во дванаесеттиот месец, повеќето бебиња спијат: 10-12 часа ноќе и уште 1-2 кратки дневни спиења.

Рутината и во оваа фаза е важна бидејќи помага бебето да се чувствува безбедно и предвидливо. Времето за спиење, оброците и игрите треба да бидат колку што е можно постојани.

Првиот роденден е повеќе од само прослава

Првиот роденден е емоционален момент за целото семејство. Не мора да биде голема забава важно е да се прослави љубовта, растот и сите мали победи од изминатите 12 месеци.

Не заборавајте да направите фотографии, но и да уживате во моментот без перфекционизам и стрес.

Што може да направите како родител во овој период?

• Охрабрете го бебето да се движи и истражува.
• Зборувајте му постојано дури и кога не ви одговара.
• Пуштајте му музика и пејте заедно.
• Погрижете се домот да е безбеден за движење и откривање.
• Подарете му време, контакт и љубов бидејќи тоа се највредните „играчки“ што постојат.

Дванаесеттиот месец е време на големи промени и гордост. Вашето бебе станува мало дете со своја изградена личност, енергија и свој глас. Иако секој ден носи нов предизвик, тој носи и најискрени насмевки.

Првиот роденден не е само негова свеченост, туку тоа е и ваш успех, доказ дека сте го воделе со љубов, трпение и грижа низ првата, најважна година од животот.