Мајка и бебе

/11 /11

Се работи за практика во која бебето вообичаено само во пелена, се поставува директно на голата кожа на градите на мајката (или таткото). Овој близок контакт не е само емотивно значаен, туку има и длабоки физиолошки и психолошки бенефити, и за бебето и за родителот.

Што е кенгур нега?

Терминот потекнува од природата, како кенгурите ги носат своите младенчиња во топлиот џеб, така и мајките (или татковците) обезбедуваат заштитна, топла средина за своето бебе преку директен контакт. Овој метод најпрво бил користен кај предвремено родените бебиња, каде се забележало подобрување во преживувањето и напредокот. Денес, кенгур негата се препорачува за сите новороденчиња, без разлика на нивната тежина или термин на раѓање.

Бенефити за бебето

Контактот кожа на кожа има огромно влијание врз здравјето и развојот на новороденчето:

1. Регулација на телесната температура

Градите на мајката имаат неверојатна способност да се прилагодуваат на потребите на бебето. Ако на бебето му е премногу ладно, телото на мајката се загрева, а ако му е премногу жешко, телото се лади. Тоа е природен „термостат“.

2. Подобро дишење и стабилен пулс

Бебињата кои се држат на кожа на кожа имаат поритмично дишење и стабилен срцев ритам. Ова е особено важно за предвремено родените бебиња, кај кои овие функции се уште незрели.

3. Полесно доење

Контактот со мајчината кожа ја поттикнува природната инстинктивна потрага на бебето по града. Бебињата полесно ја прифаќаат брадавицата, а и мајчиното тело побрзо лачи млеко.

4. Подобра дигестија и зголемување на тежина

Истражувањата покажуваат дека кенгур негата го стимулира варењето и доведува до подобра апсорпција на хранливи материи. Бебињата кои редовно добиваат ваков контакт почесто добиваат на тежина.

5. Помал стрес и подобар сон

Бебето ја слуша познатата работа на срцето и го чувствува мирисот на мајката, што му носи чувство на безбедност. Како резултат, плаче помалку и спие подолго и поспокојно.

Бенефити за мајката

Не само бебето, туку и мајката добива големи придобивки од кенгур негата:

1. Полесно воспоставување врска со бебето

Контактот кожа на кожа го зајакнува хормонот на љубовта односно окситоцин. Тој создава чувство на поврзаност, смирување и емоционална стабилност кај мајката.

2. Поголема самодоверба во грижата за новороденчето

Мајките кои практикуваат кенгур нега често велат дека се чувствуваат посигурни и поповрзани со потребите на своето бебе.

3. Подобра лактација

Окситоцинот не само што го смирува мајчиното тело, туку и директно го стимулира протокот на млеко. Така доењето станува полесно и поефикасно.

4. Намалување на ризик од постпородилна депресија

Редовниот физички и емоционален контакт со бебето може значително да ја намали анксиозноста и чувството на изолација што понекогаш се јавува по породувањето.

Татковците и кенгур негата

Иако традиционално се поврзува со мајките, кенгур негата е исто така драгоцена и за татковците. Кога таткото го држи бебето на своите гради, тој не само што помага во стабилизација на телесните функции на бебето, туку и гради посебна блискост која често му недостига во првите месеци.

Како правилно да практикувате кенгур нега?

1. Изберете мирна просторија со пријатна температура.
2. Ставете го бебето само во пелена директно на вашите гради.
3. Покријте го бебето со лесна ќебенце или облека за да му биде топло.
4. Останете во оваа положба најмалку 30 минути, но идеално е до 1-2 часа.
5. Повторувајте ја практиката секој ден. Нема ограничување на времето колку долго може да трае оваа навика.

Кенгур негата е повеќе од нежно галење. Тоа е терапија, превенција и љубов во најчиста форма. Со едноставен гест на блискост, се поддржува здравствениот и емоционалниот развој на бебето, а истовремено се зајакнува мајката или таткото.

Овој метод потсетува дека понекогаш најмоќните лекови не доаѓаат од аптека, туку од топлината на човечкиот допир.