/11 /11

Од исклучителна важност е внимателниот избор на производи, посебно во првите 12 месеци од животот на детето, бидејќи дигестивниот систем во тој период нема можност да го заштити детскиот организам од бактерии.

Еве кои производи треба да се избегнуваат во првата година од животот:

Мед, пченкарен сируп и јаворов сируп

На бебињата не треба да им се нуди било кој од овие производи, бидејќи тие можат да ја содржат бактеријата clostridium botulinum. Доколку бебето проголта производ кој ја содржи оваа бактерија, тогаш во организмот се создава отров кој предизвикува ботулизам.

Непастеризирано млеко

На бебињата не треба да им се дава кравјо млеко во првата година од животот заради можност од појава на алергии, а посебно да не им се дава непастеризирано млеко. Тоа млеко содржи патогени микроорганизми кои можат да предизвикаат различни болести. Неразвиениот имунолошки систем на бебето не може да се бори против патогените во непастеризираното млеко, па можат да настанат сериозни компликации.

Меко сирење

Меките сирења, дури и ако се чуваат во фрижидер, можат да ја содржат бактеријата listeria monocytogenes. Оваа бактерија предизвикува симптоми слични на грип, како што се повраќање, дијареја, болки во мускулите, а може да го нападне и нервниот систем. За бебињата тоа може да биде многу опасно.

Непастеризиран сок

Непастеризираниот сок може да ги содржи бактериите esherihia coli и salmonella. Околу 98% од сите сокови кои се во продажба се пастеризирани, но за секој случај прочитајте ја декларацијата.

Живи јајца

Бебињата и малите деца не би требало да консумираат производи кои содржат живо јајце бидејќи тие може да содржат бактерија salmonela enteritidis која може да предизвика сериозни состојби попратени со повраќање, дијареја и грчеви во стомакот. Секогаш варете ги јајцата додека не бидат потполно тврдо варени. Исто така внимавајте јајцата да бидат добро термички обработени и кога подготвувате друга храна.

Белка од јајце

Педијатрите препорачуваат да не им се дава белка од јајце на децата во првата година од животот. Алергиските реакции на белка се многу чести, така што најдобро е да почекате додека детето не наполни една година.

Јужно овошје

Портокали, грејпфрут, киви и останатите агруми можат да предизвикаат алергиски реакции кај бебињата под дванаесет месеци старост. Избегнувајте го ова овошје во тој период, или посоветувајте се со педијатар околу воведувањето на агруми.

Пченица и пченични производи

На бебињата не треба да им се нудат производи од пченица пред навршени  шест месеци старост, бидејќи може да предизвика алергиски реакции на глутен.

Јаткасти плодови и путер од кикиритки

Тие исто така можат да предизвикаат алергиски реакции и засркнување и не треба да се даваат на деца помали од една година.

Презасладена храна и колачи

Житарици збогатени со шеќер, колачи и засладени сокови се ниско хранливи производи. Шеќерот во тој облик нема ниту еден позитивен ефект во организмот на бебето. Таквите прехранбени навики можат да доведат до дебелеење кај децата.

Како што Вашето бебе ќе расте, така ќе се зајакнува и неговиот имунитет. До тогаш, подобро е да се воздржите од горенаведените производи при подготовка на оброк за бебе.