/11 /11

Како родители, сите ние сакаме нашите деца да израснат во одговорни граѓани и добри луѓе. Сакаме да научат да чувствуваат, мислат и дејствуваат со почитување на себеси и другите. На кратко, сакаме да развијат силен карактер.

Исто како што треба да научат како да ги врзуваат врвците од патиките, да читаат и пишуваат, да решаваат математички проблеми и да ги разберат концептите во науката и настаните во историјата, тие мора да ги развијат квалитетите на карактерот кои се ценети од страна на нивните семејства и заедницата во која живеат. Тоа се постигнува преку насоки кои ќе ги постават родителите, со цел да ги научат децата да бидат искрени и внимателни, да застанат во одбрана на сопствените принципи, да се грижат за другите, да се однесуваат одговорно и да направат цврсти морални избори.

Што значи силен карактер?

Карактерот е збир на квалитети или вредности кои ги обликуваат нашите мисли, акции, реакции и чувства. Луѓето со силен карактер:

• знаат да покажат сочувство
• се искрени и фер
• покажуваат самодисциплина во поставувањето и исполнувањето на целите
• донесуваат добри одлуки
• знаат да покажат почит кон другите
• се борат за своите идеали
• имаат силно чувство на одговорност
• се добри граѓани кои се грижат за својата заедница
• имаат самопочит

Сочувство или емпатија значи идентификување со другите и  загриженост за другите луѓе, за нивните чувства и потреби. Тоа ја развива толеранцијата на различните ставови и верувања кај луѓето, тоа не прави свесни за маките на другите, ни овозможува да се соживуваме со нив, или да го почувствуваме нивното страдање како наше сопствено. Сочувството ни овозможува да чувствуваме радост и возбуда – повеќе од бес и очај, за успесите и достигнувањата на другите.

Бебињата може да заплачат, ако слушнат звуци на плач, и да се смеат кога ќе чујат радосни звуци. На возраст од три години повеќе деца ќе се обидат да го утешат и прегрнат другарчето кое плаче, или родителот кој е вознемирен. Додека да одраснат емпатијата може да ги води нивните дејствија и однесување во позитивна насока. Тие разбираат дека доколку прават нешто погрешно, им нанесуваат болка или несреќа на своите блиски.

На пример, ако Вашето дете повреди некое друго дете, помогнете му да се фокусира на чувствата на повреденото, велејќи му:”Што мислиш, како се чувствува сега другарчето? Дали некогаш би сакал да се чувствуваш исто?”. Децата ќе развијат сочувство преку правење на добри дела и грижа за другите. Како возрасни, треба да им ја нагласиме важноста од помагање и сочувство со другите.

Што можете да направите?

-        Разговарајте додека гледате филм, или читате книга за ликовите чиј живот го следите. На пример прашајте:”Што мислиш, што чувствува сега главниот лик?”

-        Покажете ја својата грижа кон другите, како грижа за болните соседи, или отстапување на седиштето на постаро лице во автобус.

-        Предочете му и други причини за неговите сомнежи: Ако Вашето дете се жали дека соученичката намерно го турнала по скалите, кажете му дека брзала и дека не мислела да му наштети.

-        Бидете отворени за разликите: Ако Вашето дете рече:”нашата нова сосетка носи смешен фустан”, објаснете му дека луѓето често носат облека, преку која се рефлектира културата на земјата од која доаѓаат.

“ - Тато, зошто баба плаче?

  - Многу е тажна. Една од нејзините пријателки умре. Ајде, седни до мене. Се сеќаваш ли колку бевме тажни кога умре нашето куче, кое ни беше верен пријател?

  - Се чувствував тажно и осамено.

  - Е сега замисли колку полошо се чувствува баба затоа што ја загуби пријателката.       Можеби можеш да и помогнеш?

  - Можам да ја прегрнам.

  - Тоа е одлична идеја!

Продолжува...