Пар

/11 /11

Некои од овие грешки се резултат на незнаење, стрес или погрешни совети од околината.

Во продолжение, ви ги претставуваме најчестите грешки што ги прават паровите кога се обидуваат да добијат бебе и како да ги избегнете.

1. Претпоставка дека бременоста ќе се случи веднаш

Многу парови очекуваат дека ќе забременат во првиот или вториот месец од обидот. Реалноста е поинаква. Дури и кај сосема здрави двојки, зачнувањето може да потрае 6 до 12 месеци. Притисокот и нетрпеливоста само го зголемуваат стресот, што пак може негативно да влијае на плодноста.

2. Секојдневен однос со уверување дека „повеќе е подобро“

Чест однос не секогаш значи и поголема шанса за зачнување. Напротив, премногу чести односи може да ја намалат концентрацијата на сперматозоиди. Идеално е да се има однос на секои 1 до 2 дена во плодните денови.

3. Непознавање на сопствениот менструален циклус

Многу жени не го следат или не го разбираат својот циклус, па ја промашуваат овулацијата, односно најплодниот период. Следењето на базалната температура, цервикалниот секрет или користењето тестови за овулација може многу да помогне.

4. Игнорирање на здравствената состојба на мажот

Фокусот најчесто паѓа врз жената, но машката плодност е исто толку важна. Нездрав начин на живот, пушење, алкохол, прекумерна топлина (сауни, лаптоп на скут), како и хроничен стрес, сите можат да влијаат на квалитетот на спермата.

5. Самолекување или премногу информации собрани од интернет

Иако информациите се достапни насекаде, секој организам е различен. Витамински додатоци, хормонски терапии или народни лекови кои се земаат на своја рака, може повеќе да наштетат отколку да помогнат. Советот од гинеколог или специјалист за плодност е секогаш прв чекор.

6. Одложување на лекарска помош

Ако парот се обидува да зачне подолго од 12 месеци (или 6 месеци ако жената е над 35 години), време е за медицинска проценка. Одложувањето може да значи изгубено драгоцено време, особено ако постои подлабок проблем (ендометриоза, ниска подвижност на сперматозоиди, проблеми со овулација и сл.).

7. Притисок и вина меѓу партнерите

Многу парови паѓаат во замката на „обвинување“ без разлика дали е свесно или несвесно. Но стресот, анксиозноста и чувството на вина се непријатели на плодноста. Патот до бременост бара заедништво, поддршка и трпеливост, а не осуда.

Потребни се трпеливост, информираност и поддршка

Бременоста не секогаш се случува веднаш, но со вистинска стратегија, медицинска поддршка и отворена комуникација, шансите се значително повисоки. Запомнете, секоја двојка има свој пат, свој тајминг и свој процес.