Развој на мислење
Шестгодишно дете може да остане концентрирано подолго време и со радост презема нови улоги и одговорности. Во тоа треба да го насочат и да му помогнат возрасните. Често бара потврда дали добро постапило. Ги учи правилата на различни игри (карти, спорт...) Ужива ако му дадеме прилика за самостојно одлучување. Развива апстрактно мислење.

Чувството за време (порано, подоцна), оддалеченоста (блиски, далеку) се многу добро развиени, но сеуште има проблем за разграничување во категории. Сега е добар момент за учење и одредување на времето преку стрелките на часовникот.

Децата во овој период го прошируваат знаењето за функцијата и значењето на растенијата и животните, разликуваат живо од неживо и стануваат свесни за циклусот на животот: раѓање, раст, развој, стареење и смрт. Исто така во овој период почнуваат да го разбираат значењето на парите. Децата во овој период се воодушевени од светот кој ги опкружува. Често запомнуваат многу ситници кои ги интересираат и радуваат.

Лага или вистина?

Детето со шест години е способно да ја прикрие вистината и да излаже (кажува дека нешто не направило, иако е свесно дека направило) и сеуште нема развиено чувство за праведност (не знае што смее, а што не).

Учење на говорот

Вештините во јазикот се напреднати, детето зборува со комплексни, сложени и граматички точни реченици. Ги познава големите и некои мали букви, разбира дека одделна буква означува одделен глас. Знае дека кога пишува треба да остава простор меѓу зборовите и ги познава најчесто употребуваните интерпункциски знаци (?.!,) Подобро ја регулира јачината на гласот и брзината на изговорот. Ужива во игри со зборови, песни и броенки. Знае да наброи повеќе зборови кои се римуваат, или почнуваат на иста буква. Може да запамети текст и мелодија на некои песни, знае да ги отпее, или да заигра.

Броеви

Некои деца знаат да бројат до 20, а некои до 200. Шестгодишно дете знае да каже кој број следува (до 99), но потешко му е да каже кој број претходи. Знае да каже и кој број меѓу два броја е поголем. Можат да ги кажат напишаните броеви од 0 до 9 и повеќето знаат да собираат на прсти. Некои учат да собираат до 5, а други до 10. Исто така шестгодишните деца препознаваат и именуваат круг, квадрат и триаголник.

Развојни фази
Здравје и нега
Исхрана
Си играме
Добро е да се знае