Фото:Canva/Календарот на плодност е алатка која ја следи овулацијата и плодните денови. Со правилно користење, може да помогне при планирање бременост, но и да го подобри разбирањето на сопствениот менструален циклус.

/11 /11

Но иако звучи едноставно, многу жени го користат погрешно, што води до разочарување, непотребен стрес и чувство дека нешто не е во ред.

Кога се користи паметно, календарот може да биде корисен водич, но не и апсолутно правило.

Што всушност е календар на плодност?

Тоа е метод за следење на менструалниот циклус со цел да се процени кога се случува овулацијата, кои се најплодните денови и како се менува циклусот со текот на времето.

Може да биде хартиен календар, мобилна апликација или едноставни белешки.

Како да започнеш со користење?

1. Следи најмалку 3 циклуси

Еден циклус не е доволен за заклучоци. Следењето повеќе месеци дава пореална слика за твојот ритам.

2. Овулацијата не е секогаш на 14тиот ден

Ова е најчестиот мит. Кај многу жени овулацијата се поместува и не е секогаш ист ден. Може да дојде порано или подоцна па затоа календарот е проценка, не гаранција.

Како да го користиш поефикасно?

Комбинирај го со телесни знаци

Календарот е најточен кога се комбинира со: цервикална слуз, лесна болка во јајниците, зголемен либидо и промените во расположението.

Телото често дава сигнали. Затоа научи да ги препознаеш.

Плодниот период трае повеќе денови

Не е само еден точен ден. Спермата може да преживее до 5 дена, што значи дека 3 до 5 дена пред овулација се исто така важни

Не дозволувај календарот да создава притисок

Претворањето на интимноста во „обврска по распоред“ може да го зголеми стресот, а стресот не му помага на телото.

За кого е најкорисен календарот?

-        За жени со релативно редовен циклус.

-        За оние што сакаат подобро да го запознаат своето тело.

-        За парови кои сакаат природен пристап кон зачнување.

Кога календарот може да биде неточен?

Во случаи како: нерегуларни циклуси, хормонални нарушувања, период по породување, доење или висок стрес корисно е календарот да се комбинира со други методи или лекарски совет.

Што ако бременоста не доаѓа?

Календарот е алатка, не мерка за вредност или успех. Ако по подолг период нема резултат, тоа не значи дека си „згрешила“.

Разговор со гинеколог е чекор на грижа, не на пораз.

Календарот на плодност е добар сојузник кога се користи реално и без притисок. Тој помага да се поврзеш со сопственото тело, а не да го контролираш по секоја цена.