Фото:Canva/Во бременоста се случуваат бројни промени во организмот, па затоа редовното следење на крвниот притисок е важен дел од пренаталната грижа.

/11 /11

За актуелни содржини и вести од светот на родителството и бременост изберете ја Рингераја како свој омилен извор на Google.

Постави

Високиот крвен притисок во бременоста не треба да се игнорира. Понекогаш станува збор за состојба која може внимателно да се следи, но во одредени случаи може да биде знак за прееклампсија, состојба која може да влијае и врз мајката и врз бебето.

Едно мерење со повисок притисок не значи автоматски дека имате прееклампсија. Дијагнозата ја поставува медицински професионалец врз основа на повеќе мерења, симптоми и испитувања.

Што се смета за висок притисок?

Во бременоста, крвен притисок од 140/90 mmHg или повеќе се смета за покачен и бара медицинска проценка, особено ако вредноста се повторува.

Вредностите 160/110 mmHg или повеќе се сметаат за тешка хипертензија и бараат итна медицинска проценка и соодветно лекување.

Затоа, не е доволно само да се каже „малку ми е висок притисокот“. Важно е да се знае точната вредност.

Кои состојби може да се појават?

Високиот крвен притисок во бременоста може да се појави во различни форми.

-        Хронична хипертензија, висок притисок кој постоел пред бременоста или се појавил во раната бременост.

-        Гестациска хипертензија, висок крвен притисок кој се појавува по 20тата недела од бременоста, без други карактеристики на прееклампсија.

-        Прееклампсија, висок крвен притисок по 20тата недела, проследен со знаци дека се засегнати одредени органи, најчесто бубрезите, црниот дроб, мозокот или крвниот систем. Прееклампсијата може да се појави и без протеини во урината.

Зошто прееклампсијата е сериозна?

Ако не се препознае и следи навреме, прееклампсијата може да доведе до сериозни компликации кај мајката и бебето.

Може да влијае врз:

-        крвните садови и срцето,

-        мозокот,

-        системот за коагулација,

-        црниот дроб,

-        бубрезите,

-        плацентата и растот на бебето.

Во тешки случаи може да доведе и до еклампсија, состојба при која се јавуваат напади.

Кои симптоми не треба да се игнорираат?

Прееклампсијата понекогаш може да се развива без јасни симптоми, токму затоа редовните прегледи се толку важни.

Но, доколку сте бремени и се појават следните сосотојби, потребно е веднаш да побарате медицинска проценка:

-        силна или упорна главоболка,

-        заматен вид, светкавици или други промени во видот,

-        силна болка под ребрата или во горниот дел на стомакот,

-        нагло или значително отекување на лицето и рацете,

-        изразена мачнина или повраќање во втората половина од бременоста,

-        отежнато дишење,

-        чувство дека ви е многу лошо. 

Ако крвниот притисок е 160/110 mmHg или повеќе, тоа е сериозно покачување и не треба да се чека следната редовна контрола.

Како правилно да го измерите притисокот дома?

Ако лекарот ви препорачал домашно следење, важно е мерењето да биде што е можно попрецизно.

Пред мерење:

-        седнете и одморете неколку минути,

-        стапалата нека бидат на под,

-        раката нека биде потпрена на висина на срцето,

-        користете соодветна манжетна,

-        не зборувајте за времето на мерење.

Корисно е да ги запишувате датумот, времето и вредностите за да може лекарот да го следи трендот.

Не прекинувајте терапија самостојно

Некои лекови за висок крвен притисок не се соодветни во бременоста, додека други можат да се користат кога се препишани од лекар.

Ако веќе земате терапија за хипертензија, не ја прекинувајте и не ја менувајте дозата без консултација.

Исто така, не земајте „природни“ препарати, чаеви или суплементи за намалување на притисокот без да разговарате со лекар.

Како може да влијае врз бебето?

Високиот крвен притисок и прееклампсијата можат да влијаат врз функцијата на плацентата и снабдувањето на бебето со кислород и хранливи материи.

Поради тоа, кај некои трудници се следи:

-        растот на бебето,

-        количината на плодова вода,

-        протокот низ одредени крвни садови,

-        срцевата активност на бебето,

-        состојбата на плацентата.

Колку често ќе се прават контролите зависи од конкретната состојба.

Дали висок притисок значи дека веднаш следува царски рез?

Самата хипертензија не значи автоматски потреба од царски рез.

Одлуката за начинот и времето на породување зависи од повеќе фактори како гестациската возраст, тежината на состојбата, состојбата на мајката, состојбата на бебето и тоа како бременоста се развива.

Кај некои жени може да се продолжи со внимателно следење и терапија, додека кај тешка прееклампсија понекогаш е побезбедно бременоста да се заврши порано.

Може ли да се спречи?

Не постои начин целосно да се спречи секој случај на хипертензија или прееклампсија. Но редовната пренатална грижа е исклучително важна бидејќи овозможува проблемот да се открие навреме.

Кај жени со одредени фактори на ризик, лекарот може да препорача превентивни мерки, вклучително и ниска доза аспирин во одредени ситуации.

Аспирин не треба да се започнува самостојно во бременоста. Дали е потребен, кога се започнува и во која доза одлучува лекар.

Не чекајте да почувствувате симптоми

Високиот крвен притисок во бременоста понекогаш може да биде присутен без да се чувствувате лошо. Затоа, контролите не се формалност.

Мерењето на притисокот, анализата на урина и крвните испитувања, заедно со следењето на бебето, му помагаат на медицинскиот тим навреме да забележи промени.

Бременоста не е време за игнорирање на предупредувачките знаци

Ако притисокот е покачен, не паничете, но не го занемарувајте.

Измерете повторно правилно кога е соодветно, следете ги упатствата од вашиот лекар и побарајте медицинска помош ако вредностите се високи или имате алармантни симптоми.

Навремената реакција може да направи огромна разлика