Фото:Canva/Сонот често се смета за паузa во денот, но кај децата тој е активен и клучен процес за раст, развој и здравје. Иако исхраната и физичката активност се важни, сонот е тивкиот фактор што често се занемарува.

/11 /11

Колку сон им е потребен на децата?

Потребата од сон се менува со возраста:

• Kaj бебиња потребнои се од 12 до 16 часа.
• Кај деца од 1 до 2 години потреби се 11 до 14 часа сон.
• За деца од предучилишна возраст потребни се 10 до 13 часа сон.
• За деца од училишна возраст, 9 до 12 часа сон.
• Кај адолесценти од 8 до 10 часа.

Хроничниот недостаток на сон, дури и од еден час помалку дневно, може да има последици.

Како недостатокот на сон влијае врз телесната тежина?

1. Нарушување на хормоните за регулирање на гладот

Недоволниот сон го нарушува балансот на: лептин, хормонот што сигнализира ситост и грелин, хормонот што го зголемува апетитот.

Резултатот е дете кое почесто чувствува глад, особено за калорична и слатка храна.

2. Зголемена желба за нездрава храна

Уморниот мозок полесно посегнува по: слатки, брзи јаглехидрати и грицки со многу масти. Недостатокот на сон ја намалува самоконтролата и способноста за здрав избор.

3. Помала физичка активност

Децата кои не спијат доволно: имаат помалку енергија, се помалку активни и почесто избираат пасивни активности како седење пред екран.

Помалото движење значи и помала потрошувачка на енергија.

4. Забавен метаболизам

Сонот е време кога телото се регенерира и време кога се регулираат метаболичките процеси. Кога сонот е недоволен, метаболизмот не функционира оптимално, што може да придонесе за зголемување на телесната тежина.

Екраните и сонот се опасна комбинација

Сината светлина од телефони, таблети и телевизори го потиснува лачењето на мелатонин, а со самото тоа се одложува заспивањето и сонот станува пократок и со полош квалитет. Децата кои користат екрани пред спиење имаат поголем ризик од нарушен сон и зголемена тежина.

Долгорочни последици

Хроничниот недостаток на сон кај децата може да доведе до: зголемен ризик од прекумерна тежина и дебелина, инсулинска резистенција, пониска концентрација и емоционални промени

Овие ефекти можат да продолжат и во адолесценцијата и зрелото доба.

Како родителите можат да помогнат?

Воспоставете редовна рутина за спиење кај вашето дете. Исклучете го и забранете гледање во екран најмалку 1 час пред легнување. Создадете мирна и затемнета средина за сон. Внимавајте на доцни и тешки оброци и секако бидете пример дека и возрасните треба да го почитуваат сонот.

Сонот е основна биолошка потреба. Кај децата, доволниот и квалитетен сон е еднакво важен како здравата исхрана и движењето. Ако сакаме да го заштитиме нивното здравје и правилен раст, мора да го ставиме сонот високо на листата на приоритети. Здрава тежина започнува и со добар сон.