Промените на грлото на матката се сметаат како спореден, додатен метод за утврдување на овулација и тесно се поврзани со промената на цервикалната слуз. Како што цервикалната слуз во текот на овулација ја менува својата структура (провидноста, густината), така и грлото на матката ја менува својата положба и поинакво е на допир. Овие промени настануваат како последица на промените на нивото на естроген во организмот.

Веднаш по завршување на менструација, грлото на матката е цврсто и суво. Тоа се наоѓа ниско во вагината, што значи дека е близу и лесно може да се допре со прст, но самиот “влез” во матката е непристапен и тесен, бидејќи има малку цервикален секрет. Како се приближува овулација така и грлото на матката станува помеко и повлажно на допир и полека почнува да се повлекува подлабоко во вагината.

Во тек на овулација грлото е потполно меко и многу влажно, поради зголемениот цервикален секрет, а влезот во матката е потполно прооден. Во овој период грлото се наоѓа длабоко во вагината, далеку е и недопирливо со прст.  

По овулација, потребно е помеѓу 24 и 48 часа за да може грлото да се врати во иста положба како на почетокот на циклусот.

За да ја проверите состојбата на грлото на матката користете еден или два прста, како ви е полесно. Доволно е само со врвот на прстот нежно да го допрете грлото. Важно е рацете да ви бидат чисти и суви и да немате долги нокти. Грлото на матката треба да се проверува секој ден во исто време и телото треба да биде во иста положба (на пр. додека стоите со едната нога подигната на кревет или када). Овие промени не можат лесно да се препознаат, доколку ова не сте го правеле порано, но не се откажувајте, бидејќи по само три до четири циклуси ќе стекнете доволно искуство за да ги препознаете овие фази.