mami
|
„Клубот Матица“ и годинава традиционално по деветти пат од 21 до 31 јануари ќе го организира својот саем под мотото „Книга во секој дом“. На книжевната манифестација на читателите ќе бидат понудени повеќе од 5.000 наслови од белетристика, уметност, архитектура, дизајн, економија, маркетинг, менаџмент, историја, филозофија, право и политика, гастрономски прирачници од сите кујни во светот, речници и лексикографија, музика и филм, медицина, книжевност, детска литература, друштвени и креативни игри итн. Просечната цена на насловите кои се понудени е 169 денари. Ќе бидат застапени книги од позначајните македонски издавачи, како и над 2.000 наслови по симболични цени од познати американски, британски и германски издавачки куќи. Цената на англиските и германските изданија ќе се движи од 100 до 400 денари. Промоција и средба на читателите со македонските автори ќе се одржува секој ден. - Посебен акцент на овој саем ќе ставиме на промоција на неколку македонски автори. Идејата ни беше конечно да почнеме со интеракција меѓу читателот и авторот. Читателите ќе имаат можност на одредени датуми и периоди од денот да се сретнат и поразговараат на теми кои ги интересираат и да им поставуваат прашања на авторите, рече на денешната прес-конференција директорот на „Матица“ Дејан Павлески. Членовите на Клубот и сите читатели ќе имаат можност во рамките на книжевната манифестација да ги најдат сите книги од позначајните македонски издавачи како што се „Темплум“, „Или или“, „Култура“, „Табернакул“, „Македонска реч“, „Детска радост“, „Просветно дело“, „Макавеј“ итн. Саемот „Книга во секој дом“ е распространет и во Охрид, Струга, Битола, Кавадарци, Прилеп, Неготино, Гевгелија, Штип, Струмица, Радовиш, Делчево, Куманово и Тетово. Во изминатите девет години, посочи Павлески, саемот „Kнига во секој дом“ бележи зголемување на бројот на посетители и читатели. Статистиката покажува дека на првиот организиран саем во 2001 година биле продадени 7.000 книги, а имало посетеност од 3.000 читатели. Минатата година продажбата достигнала 80.000 книги, а посетеноста е зголемена за повеќе од дваесет пати односно 60.000 луѓе го посетиле саемот. - Очигледно саемот ја остварува својата цел како книжевна манифестација, а тоа е да ја направи книгата достапна за сите граѓани во Македонија. Овие бројки покажуваат дека македонските граѓани се образовани, ја сакаат и почитуваат литературата и книгата и ги следат сите светски трендови од сите области, додаде Павлески. Авторот Блаже Миневски изрази благодарност што издавачката куќа „Матица Македонска“ во акцијата го земала предвид неговиот роман „Требаше да се сликаме пред да се замразиме“. - Се надевам дека годинава бројката од 80.000 продадени книги можеме да ја заокружиме на 100.000. Оваа акција во „Матица“ со приближување на книгата кон читателите со 80.000 купени книги минатата година е една наша квалификација да излеземе надвор и да бидеме рамноправен натпреварувач на полето за културен натпревар во Европа, истакна Миневски. Тој рече дека книгите кај нас досега се печатеа и најголем дел остануваа во подрумите. - Треба дефинитивно да престанеме да печатиме книги за подруми, за квантитет. Сега ни треба квалитет и продажба на книгата. Ова е прекрасна акција за книгите да стигнуваат до читателите и преку ниските цени и големиот интерес, додаде Миневски.
|