/11 /11

За бебето на возраст од 12 - 18 месеци, огледалото е неопходна играчка, која овозможува сфаќање на телесната шема, односно гледање на сопственото тело во просторот. Иако бебето сеуште не се препознава себе, набрзо ќе почне да си игра со својот лик во огледалото.

Реакција на огледалото

Првите реакции на бебето на огледало се во главно чудење, страв и радозналост, па затоа е добро покрај бебето да биде мајката, таткото, или некоја друга возрасна личност за бебето и нив да ги види во ликот на огледалото.

Насмевката на нивните лица во огледалото ќе го смири бебето и тоа ќе почне да се смее. Некои деца веднаш добро реагираат, го допираат ликот во огледалото, се обидуваат да го извлечат или тргнат настрана, го бакнуваат...што никако не значи дека детето е нарцисоидно, како што повеќето родители би помислиле. Ова е само една фаза од растењето низ која детето поминува, а Вие треба да му овозможите тоа да го направи на вистински начин.

Таму сум јас

Најдобро е огледалото да биде прицврстено за ѕид, да не може да падне и доволно големо за детето да може да се види во целост и да го види лицето на мајката покрај себе. Како на оваа возраст децата лазат, огледалото треба да биде поставено ниско, за детето да може да го користи кога ќе посака. Во случај да нема можност за тоа, треба да му дадете пластично огледало во кое ќе може да го види својот лик.

Пат до самостојноста

Гледајќи се себе во огледалото детето полека сфаќа дека е одвоено од мајката, што е пат до неговата самостојност. Кога ќе се препознае себе – зависи од неговата зрелост. Ова е долг процес кој се одвива во периодот меѓу првиот  и вториот роденден.