Фото:Canva/Бременоста не значи дека треба да престанете да се движите. Напротив, доколку нема медицинска причина за ограничување на активноста, редовното движење се препорачува во текот на бременоста.

/11 /11

За актуелни содржини и вести од светот на родителството и бременост изберете ја Рингераја како свој омилен извор на Google.

Постави

За повеќето здрави трудници, редовното умерено движење е безбедно и корисно, а најважно е активноста да се приспособи на телото, периодот од бременоста и препораките од лекарот.

Според Светската здравствена организација, кај трудници без медицински контраиндикации се препорачуваат најмалку 150 минути умерена аеробна физичка активност неделно.

Тоа може да се распредели во повеќе денови и да вклучува различни видови движење, како пешачење, пливање, возење статичен велосипед, лесни вежби за сила и нежно истегнување.

Не мора сeкоја активност да биде тренинг

Кога зборуваме за физичка активност, не мислиме само на вежбање во теретана. Пешачењето до продавница, качувањето по скали, лесните домашни активности и секојдневното раздвижување исто така се дел од физичката активност.

На пример, 30 минути побрзо пешачење во текот на денот, пет дена во неделата, може да ве доведе до препорачаните 150 минути.

Ако досега не сте биле активни, не треба веднаш да започнете со долги тренинзи. Почнете со пократки периоди и постепено зголемувајте го времето и интензитетот според тоа како се чувствувате.

Како да знаете дека темпото е соодветно?

Умереното движење не треба да ве остава целосно без здив или исцрпени. Добар практичен ориентир е за време на активноста да можете да разговарате.

Ако одредена активност ви предизвикува болка, непријатност или чувствувате дека премногу ве исцрпува, забавете или прекинете.

Која активност може да биде добар избор?

Во зависност од здравствената состојба и претходното искуство, може да се изберат:

• пешачење,
• пливање,
• вежби прилагодени за бременост,
• лесни вежби за сила,
• статичен велосипед,
• нежно истегнување и вежби за мобилност.

Комбинирањето на аеробна активност со вежби за зајакнување и нежно истегнување е дел од препораките за физичка активност во бременоста.

Не постои иста мера на активност за секоја трудница

Она што е доволно за една жена може да биде премногу или премалку за друга. Важно е да се земат предвид физичката форма пред бременоста, текот на бременоста, триместарот и евентуалните медицински состојби.

Редовното движење во бременоста е поврзано со повеќе здравствени придобивки, меѓу кои помал ризик од гестациски дијабетес, прекумерно зголемување на телесната тежина и некои компликации поврзани со бременоста.

Препораките за физичка активност не важат на ист начин за секоја бременост. Ако имате компликации или состојба поради која лекарот ви препорачал ограничување на активноста, следете ги неговите упатства. При крвавење, истекување плодова вода, болни или редовни контракции, силна вртоглавица, болка во градите или отежнато дишење, прекинете со активноста и побарајте медицинска проценка.

Забелешка: 

Сите материјали, публикации, коментари, теми и категории, како и целата содржина на Рингераја.мк, се од информативен карактер и истите НЕ можат да заменат консултација со лекар за дијагностика и лечење. За се што е поврзано со Вашето здравје, консултирајте се со својот матичен лекар.