Фото:Canva/Во второто тромесечје, бебето расте, неговите органи продолжуваат да созреваат, се развиваат сетилата, а движењата стануваат сe поизразени.

/11 /11

За актуелни содржини и вести од светот на родителството и бременост изберете ја Рингераја како свој омилен извор на Google.

Постави

Неговото тело постепено добива попрепознатлив изглед, коските зајакнуваат, мускулите се развиваат, а сетилата почнуваат сè поактивно да функционираат. Во овој период многу трудници за првпат ги чувствуваат движењата на бебето.

Од недела во недела, плодот станува сè поактивен и се подготвува за следната фаза од развојот.

14та недела - лицето добива појасни црти

Бебето е долго околу 8 до 9 сантиметри, мерено од темето до задникот. Вратот станува поизразен, а очите и ушите постепено се приближуваат до својата конечна положба. Може да ги движи рацете и нозете, да ја врти главата и да прави движења со устата. Телото почнува побрзо да расте во однос на главата.

15та недела - коските стануваат посилни

Коскениот систем продолжува да се развива и да зајакнува. Кожата сè уште е многу тенка, а крвните садови се видливи низ неа. Бебето може да ги движи сите екстремитети, да ги свиткува лактите и колената и да ги прави првите посложени движења.

16та недела - движењата стануваат поактивни

Плодот е долг приближно 11-12 сантиметри од темето до задникот. Мускулите се развиваат, а движењата стануваат посилни и подобро координирани. Очите може да се движат, а ушите се приближуваат до конечната положба. Кај некои трудници во следните недели може да се почувствуваат првите нежни движења.

17та недела - се создава поткожно масно ткиво

Бебето продолжува да расте, а телото постепено почнува да создава масно ткиво кое подоцна ќе му помогне да ја регулира телесната температура. На кожата се развива верникс, белузлава заштитна материја која ја штити од постојаното изложување на плодовата вода. Срцето редовно пумпа крв низ организмот.

18та недела - почнува да ги слуша звуците

Слухот се развива, па бебето постепено почнува да ги регистрира звуците од телото на мајката, како и одредени звуци од околината. Нервниот систем продолжува да созрева, а движењата стануваат сè поразновидни. Во овој период често се прави и детална ултразвучна процена на анатомијата на плодот, според препораката на гинекологот.

19та недела - сетилата продолжуваат да се развиваат

Мозокот ги развива областите одговорни за допир, вкус, мирис, вид и слух. На кожата се појавува повеќе верникс, а телото е покриено со фини влакненца наречени лануго. Нозете продолжуваат да растат и постепено добиваат пропорции поблиски до оние што ќе ги имаат при раѓањето.

20та недела - половина од бременоста

Ова е приближно средината на бременоста. Бебето е долго околу 25 сантиметри мерено од главата до петиците. Голта плодова вода, ги движи рацете и нозете и може да реагира на звуци. Движењата кај многу трудници стануваат полесно препознатливи, иако нивното чувство зависи од положбата на плацентата и други индивидуални фактори.

21ва недела - дигестивниот систем вежба

Бебето продолжува да голта плодова вода, со што го вежба дигестивниот систем. Во цревата почнува да се собира мекониум, првата столица што ќе ја исфрли по раѓањето. Нервниот систем и мускулите се развиваат, а движењата стануваат сè поорганизирани.

22ра недела - лицето станува попрепознатливо

Очите, носот и усните се добро оформени. Бебето може да ги движи очните капаци, а веѓите и трепките стануваат повидливи. Слухот продолжува да се развива, па може да реагира на одредени звуци и вибрации. Кожата сè уште е тенка и набрана, бидејќи поткожното масно ткиво не е целосно развиено.

23та недела - белите дробови се подготвуваат за дишење

Белите дробови продолжуваат да се развиваат и се формираат структури важни за идното дишење. Бебето прави движења слични на дишење, но кислородот сè уште го добива преку плацентата и папочната врвца. Кожата е црвеникава и набрана, а телото постепено добива на тежина.

24та недела - развојот на мозокот се забрзува

Мозокот продолжува интензивно да се развива, а белите дробови создаваат клетки што почнуваат да произведуваат сурфактант – супстанција важна за правилното функционирање на белите дробови по раѓањето. Бебето има поизразени периоди на спиење и активност. Во случај на предвремено раѓање, ова е период во кој може да постои можност за преживување со интензивна неонатална нега, но ризиците од сериозни компликации сè уште се значителни.

25та недела - реагира на звуци и допир

Бебето продолжува да добива на тежина, а нервните врски се развиваат. Може да реагира на гласни звуци и да ги менува движењата. Кожата постепено станува помалку проѕирна, бидејќи се создава сè повеќе поткожно масно ткиво.

26та недела - очите почнуваат да се отвораат

Очите на бебето почнуваат да се отвораат, а развојот на видот продолжува. Мозокот и нервниот систем сè подобро ги координираат движењата. Белите дробови продолжуваат да созреваат, а бебето сè почесто прави движења на градниот кош слични на дишење.

27ма недела - завршува второто тромесечје

Бебето тежи приближно 900-1.000 грама и е долго околу 36-37 сантиметри од главата до петиците. Мозокот расте и добива посложена структура, а белите дробови и другите органи продолжуваат да созреваат. Бебето има препознатливи периоди на активност и одмор, а неговите движења обично се сè поизразени.

Што е важно да следите во второто тромесечје?

Ова е период во кој многу трудници се чувствуваат подобро во споредба со првите месеци од бременоста. Сепак, редовните гинеколошки контроли остануваат важни за следење на растот и развојот на бебето.

• Следете ги движењата. Првите движења најчесто се чувствуваат меѓу 16тата и 24тата недела. Ако до 24тата недела сè уште не сте почувствувале движења, разговарајте со гинекологот. Ако веќе сте воспоставиле препознатлив образец на движења и забележите дека бебето се движи помалку од вообичаено, веднаш побарајте медицински совет.
• Одете на препорачаните прегледи. Деталниот ултразвучен преглед најчесто се изведува во периодот од 18тата до 22рата недела, според протоколот и препораката на лекарот.
• Внимавајте на исхраната. Разновидната исхрана, доволниот внес на течности и препорачаните суплементи придонесуваат за здравјето на мајката и правилниот развој на плодот.
• Не ги игнорирајте предупредувачките симптоми. Вагинално крвавење, истекување течност, силна болка или други нагли и загрижувачки промени бараат медицинска процена.

Второто тромесечје е исполнето со важни развојни чекори. Од малите движења до сè поизразените реакции на звуци, секоја недела носи нови промени. Иако секое бебе има свое темпо на развој, редовните прегледи се најдобриот начин да се следи дали растот и развојот се одвиваат очекувано.

Наведените должини и тежини се приближни вредности и може да варираат од бременост до бременост. Развојот на плодот се проценува индивидуално, во согласност со гестациската возраст и ултразвучните наоди. 

Забелешка: 

Сите материјали, публикации, коментари, теми и категории, како и целата содржина на Рингераја.мк, се од информативен карактер и истите НЕ можат да заменат консултација со лекар за дијагностика и лечење. За се што е поврзано со Вашето здравје, консултирајте се со својот матичен лекар.