08.06.2020 денот кога се промени мојот живот. Денот кога станав мајка и денот кога сфатив дека Господ ми подари мала принцезичка и огромна одговорност.Преокупирана со читање за породувањето и доењето ме фати страв колку брзо ќе ми дојде млеко кога ме известија дека ќе се порoдувам со царски рез. Се што знаев во моментот беше дека сакам и дека ќе го дојам моето бебе. Кога за прв пат ја донесоа мојата принцеза на доење бев преплашена и возбудена. Преплашена затоа што мислев дека нема да ми надојде млеко и дека нема да можам да и помогнам околу цицањето. Возбудена затоа што таа беше толку малечка и преубава. Истиот момент кога ја ставија на мојата града таа инстиктивно започна веднаш со цицање и мислам дека тоа ми даде надеж и поттик дека јас можам. Доењето навистина беше предизвик на почетокот. Потешкотии, распукани брадавици, крвавење но не се откажав. Болката беше само потсетување дека мора да бидам трпелива и да верувам во себе, а потоа конечно трудот се исплатеше. Доењето е најскапоцениот дар кој една мајка може да му го даде на своето дете. Веќе скоро два месеци сме на ексклузивно доење и морам да признаам иако не се работи за долг период, доењето е најинтимниот чин помеѓу мајката и детето. Секоја мајка треба да биде храбра, да знае дека може и да има силна волја која ќе и биде водилка во ова патување, затоа што секоја мајка е суперхерој. ❤️