Првото тромесечје наскоро ќе заврши, а со тоа и најкритичниот дел од развојот на плодот. Општата состојба би требало да се промени, но вистина е дека и понатаму можат да ве мачат главоболки. Овој пат поради зголемено количество на крвта во телото. Ако главоболката стане неподнослива, не одложувајте, барајте лекарски совет! Некои трудници се полни со енергија и креативни идеи за изгледот на детската соба, каква количка ќе изберат и каква облека ќе купат за своето бебенце... Други пак со доза на страв гледаат на иднината. Само без грижа, имате уште многу време да се запознаете со тоа мало човече кое расте под вашето срце!

Стомачето полека, но сигурно се заоблува. Уште малку и можете да го покажете на целиот свет!

И уште една добра вест – опасноста од спонтан абортус секој ден е помала. Иако сме цврсто уверени дека се ќе се заврши онака како треба, сепак ве предупредуваме дека постои и форум каде своите искуства ги делат и жени на кои бременоста не им била судена. Понекогаш е добро трудниците да не читаат такви информации, бидејќи на форумите судбината најчесто ја делат оние на кои им се случило нешто страшно. Психичката смиреност на идните мајки е многу важна и размислувањето за несреќни приказни често не е на место. Ако пред тоа ви беше страв да ја поделите радосната вест поради можниот абортус, сега веќе можете да да го направите тоа со сите луѓе околу себе!

Во овој период матката уште малку ќе се поткрене, и понатаму ќе расте за да му овозможи на фетусот простор за движење. Матката сега веќе нема да ја притиска бешиката, што значи дека нема да одите толку често во тоалет. Уживајте додека трае, бидејќи во последното тромесечје ќе се повтори приказната од почетокот на бременоста. Тогаш големата матка пред се поради тежината на плодот повторно ќе ја притиска бешиката.

Со ултразвучниот тест кој се вика нухална бразда, за кој веќе пишувавме во делот за 11. недела, се утврдува ризикот од Даунов синдром, односно трисомија 21. хромозом во плодот. Тоа е најчеста хромозомска неправилност кај живородените деца. До промени кај повеќето доаѓа случајно, во моментот на созревање на половите клетки кај еден од родителите, најчесто мајката. Ризикот од неправилностите расте со годините на жената (посебно по 35. година од животот на мајката) затоа и веројатноста за овие хромозомски неправилности расте. Стручните лица овој преглед го препорачуваат на секоја трудница, а не само на постарите, бидејќи 2/3 од децата со Даунов синдром се родени од млади мајки. Притоа можете добро да го погледнете бебето кое расте во вашето тело и можеби гинекологот, кој мора да има посебна лиценца за овој преглед, ќе ви го открие полот на бебето.

>>  Плод во 12. недела
>>  Тато во 12. недела