Фото:Canva/Основни информации што им помагаат на паровите подобро да го разберат процесот и можните пречки до бременост.

/11 /11

Овој краток информативен водич има цел да понуди јасно, нежно и корисно објаснување за тоа што претставува неплодност и како паровите можат да се справат со неа.

Што точно е неплодност?

Неплодноста се дефинира како неспособност да се постигне бременост по 12 месеци редовни, незаштитени сексуални односи.
Кај жени постари од 35 години, овој период се намалува на 6 месеци, бидејќи плодноста природно се намалува со возраста.

Важно е да се знае дека неплодноста не значи дека нема шанси за бременост туку дека зачнувањето може да биде потешко или ќе има потреба од медицинска поддршка.

Колку е честа неплодноста?

Се проценува дека секој 7-ми пар се соочува со потешкотии при зачнување.
Тоа значи дека проблемот е многу почест отколку што се зборува за него.
Неплодноста може да потекнува од:

• жената (околу 30–40%),
• мажот (околу 30–40%),
• од двајцата (околу 20%),
• или да биде необјаснива (околу 10%).

Главни причини за неплодност кај жената

Неплодноста кај жените најчесто е поврзана со: нарушена овулација каде ПЦОС е најчестата причина, проблеми со јајцеводите, ендометриоза, хормонални нарушувања, слаб квалитет на јајце клетки, проблеми со тироидната жлезда, напредната возраст.

Главни причини за неплодност кај мажите

Кај мажите најчесто се работи за: низок број или слаб квалитет на сперматозоиди, намалена подвижност, блокирани канали, хормонални нарушувања, воспаленија, изложеност на токсини, пушење, алкохол, дроги и слично.

Кога треба да се побара медицинска помош?

Потребно е да се обратите кај гинеколог или специјалист за плодност ако:

• се обидувате повеќе од една година или шест месеци ако жената е над 35 години
• циклусите се нередовни или сосема изостануваат
• постои позната дијагноза како ПЦОС, ендометриоза, проблеми со тироидна жлезда итн.
• постојат болки при однос или менструација
• мажот има проблеми со ерекција или ејакулација.

Како изгледа дијагностичкиот процес?

Обично вклучува: ултразвук, проверка на хормони, тестови за овулација, проверка на јајцеводите (ХСГ), спермограм кај мажот.

Во голем дел од случаите, дијагнозата може брзо да се постави и да понуди јасен план за понатамошно лекување.

Како се лекува неплодноста?

Опциите зависат од причината, но може да вклучуваат:

• регулација на хормони
• стимулација на овулација
• третман на инфекции
• хируршки зафати
• инсеминација (IUI)
• ин витро оплодување (IVF)
• промени во стилот на живот

Важно е да знаете дека голем број парови успеваат да добијат дете со соодветна терапија.

Емоционалниот дел е често занемарен, но најтежок

Неплодноста не е само медицинска дијагноза. Таа влијае на: самодовербата, партнерската врска, менталното здравје,чувството на иденитет

Стравот, тага, вина и притисок од околината се нормални реакции. Затоа се потребни поддршка, разбирање и отворена комуникација.

Неплодноста е патување кое може да биде долг и непредвидлив процес, но постојат многу начини да се постигне посакуваната цел да се стане родител.
Најважно е да знаете дека не сте единствени кои се соочуваат со ова и дека неплодноста е решлива во огромен број случаи, а барањето поддршка не е слабост, туку храброст.