Жена

/11 /11

Иако се одвива тивко и безболно кај многу жени, некои сепак чувствуваат мали, но специфични симптоми кои може да бидат првиот знак дека во нивната утроба нов живот започнал да се формира.

Што е имплантација?

Имплантацијата се случува обично 6 до 10 дена по овулацијата, односно неколку дена по оплодувањето. Тоа е моментот кога ембрионот пристигнува до матката и се прикачува на нејзиниот ѕид (ендометриум), започнувајќи процес на развој на плацентата.

Кои се можните симптоми на имплантација?

Не ги чувствуваат сите жени, но кај оние што ги имаат, овие се најчестите:

-        Благо крвавење или „имплантациско крварење“

Ова е најчестиот симптом и се јавува кај 15–30% од жените. Се појавува како светлорозев, кафен или црвенкаст исцедок, обично неколку капки, многу помалку од менструално крварење и трае 1–2 дена.

-        Благи грчеви или болка во долниот дел на стомакот

Слична на менструална болка, но обично поблага. Најчесто се јавува на една страна и не трае подолго од неколку часа или ден.

-        Чувствителни гради

Како резултат на раниот пораст на хормонот хЦГ, градите може да станат поболни или набабрени дури и пред да задоцни менструацијата.

-        Замор

Телото веднаш почнува да работи „прекувремено“. Можеби ќе почувствувате нагло чувство на исцрпеност или потреба за повеќе сон.

-        Промени во телесната температура (BBT)

Доколку ја следите базалната телесна температура, може да забележите нејзино лесно зголемување и одржување на повисоко ниво подолго од обично.

-        Мали промени во расположението

Иако делуваат како ПМС, хормонските промени поврзани со имплантацијата можат да предизвикаат ненадејна чувствителност, плачливост или раздразливост.

Што следува после имплантацијата?

Откако имплантацијата е успешна, телото почнува со производство на хормонот хЦГ, кој е одговорен за позитивен тест на бременост. За најпрецизни резултати, препорачливо е да почекате 3–5 дена по имплантацијата пред да направите тест.

Имплантацијата е деликатен, но важен чекор во почетокот на бременоста. Иако симптомите може да бидат незабележливи или лесно заменети со ПМС, внимателното слушање што сака да ви каже телото може да ви го даде и првиот сигнал за тоа дека сте бремени. Доколку се сомневате, направете тест и консултирајте се со вашиот гинеколог.