/11 /11

Во истражувањето учествувале 85176 бебиња, кои се родени во периодот од 2002 – 2008 година. Научниците го следеле развојот на бебињата, но и количината на фолната киселина која ја примале нивните мајки во текот на бременоста.

На крајот на истражувањето 270 деца покажувале знаци на аутизам. Жените кои пред и за време на бременоста пиеле фолна киселина, го намалиле ризикот од појава на аутизам за 40%.

Претходните истражувања покажаа дека многу жени почнуваат да земаат фолна киселина многу подоцна отколку што им препорачува лекарот.  Научниците го зеле во предвид и фактот што многу бремености се случуваат непланирано, па не постои можност да се зема фолна киселина пред бременоста.

Фолната киселина им припаѓа на витамините Б-комплекс и потребна е за синтеза и обновување на ДНК. Помага во намалување на ризикот од оштетување на невралната цевка, која по правило се затвора 28 денови по зачнувањето, а поголемиот дел од развојот на мозокот се случува во периодот од 15-56 дена по зачнување.

Освен во суплементи, фолната киселина може да се пронајде во зелениот листест зеленчук, грашак, грав, леќа, јајца и квасец. На трудниците им се препорачува дневно да внесуваат околу 400 микрограма фолна киселина.